ازيكم عاملين ايه ! أولا ًشكرا علي زيارتكم للموقع بتاعي و ثانياً حابه أعرفكم بنفسي و الهدف من الموقع ده عشان تعرفوا تستمتعوا بيه !

أنا نهال الديب أبتديت اتعلم ياباني من سنه 2008 في مؤسسه اليابان و فضلت اتعلم هناك ياباني لحد سنه 2014 .... سبب تعلمي للغه اليابانيه هو اني من و انا صغيره كنت بحب اتفرج علي الانمي الياباني بس ساعتها كنت بتفرج عليه بدبلجه عربي فا ساعتها كنت عمري ما سمعت اللغه اليابانيه لحد ما كبرت و شوفت ناروتو و ديث نوت و ساعتها كانت اول مره اسمع ياباني في حياتي و من ساعتها اتولد جوايا رغبه كبيره في اني اتعلم اللغه اليابانيه ! استنيت لحد ما بقي عمري 18 سنه و قدمت في مؤسسه اليابان و من هنا ابتدت رحلتي في تعلم اللغه اليابانيه .. كنت ساعتها ماعرفش أي حاجه عن سيستم الحروف ولا الكانجي ولا اي حاجه حرفياً ابتديت مش من الصفر لأ .. ابتديت من تحت الصفر كمان!

في سنه 2012 كنت تقريبا في لفل 6 سافرت اليابان في منحه تبع مؤسسه اليابان و قعدت أسبوعين هناك.. و كانوا من أجمل الايام اللي قضيتها في حياتي اختلطت بالشعب الياباني و شوفت الاماكن اللي كنت بشوف صورها علي النت و جربت الاكل الياباني و كانت تجربه ما تتنسيش.. عملت صداقات مع أصدقاء من جنسيات كتيره و اللي جمعنا حاجه واحده.. حبنا لليابان و اللغه اليابانية.

لحد ما خلصت الكورسات سنه 2014 بس خليني اقول حاجه .. ساعتها ماكنش ليا هدف واضح .. ليه عاوزه أعذب نفسي و أتعلم ياباني بجد ! ماكنش فيه اي حاجه واضحه .. ساعتها كنت علي قدي جدا في الكلام بس ما استسلمتش و أشتغلت في شركتين ياباني لحد ما في سنه 2017 اتجوزت و من هنا للأسف نسيت أهتم بمذاكره الياباني لحد ما نسيته ! فا رجعت لنقطه الصفر من تاني ! في 2020 في بدايات الكورونا .. والحبسه في البيت ابتديت شويه شويه أفكر أذاكر تاني ياباني .. و بجد الموضوع كان برضه صعب ! فضلت أذاكر مع نفسي لحد ما دخلت امتحان JLPT N3 و نجحت فيه .. و بعدها حسيت انه برضه مش عارفه أرجع أتكلم زي الأول فا قررت أرجع لمؤسسه اليابان و أبتديت من ساعتها من لفل 8 الحمدلله و كملت فيها لحد لفل 11 و اتخرجت من المؤسسه لتاني مره في 2025 !

بس المره دي بقي قررت أن يكون ليا هدف أقدر أحافظ بيه علي ممارستي للغة وما أنسهاش خصوصاً أن ماعنديش فرصه أتكلم أو أتعامل مع يابانيين نهائي حالياً .. ولغه من غير ممارسه عمرك ما حتتقدم فيها .. فا قررت أمارس اللغه عن طريق اني أعمل فيديوهات اتكلم فيها في مواضيع عشوائيه و بعدها أتطور الموضوع اني حبيت انقل الثقافه المصريه بعيوني انا لليابانيين ! بس مش عاوزه انقل حاجات عاديه لا .. انا عاوزه اعرفهم علي الاكل المصري المعروف منه و اللي مش معروف كمان و مش واخد شهره زي مثلا الفول و الطعميه .. أعرفهم علي ثقافتنا و طريقه تفكيرنا .. لهجتنا المصرية اللي تعبيراتها مميزه جدا .. افلامنا و مسلسلاتنا .. احتفالاتنا و فنونا الشعبيه ! لو حد سألني ايه هي الثقافه المصرية حقوله الثقافه المصريه مش بس تاريخنا المصري القديم و لا اثارنا بس .. ثقافه يعني جميع النواحي في حياتنا من تعامل و علاقات و طريقتنا في الكوميديا والدين و علاقتنا الاجتماعيه و حاجات كتير قوي بتميزنا .. و انا شايفه اكتر ما بيميزنا هو حسنا الفكاهي وقت الازمات !

و ده اللي يوصلنا لهدفي من الموقع ده هو اوريكوا مصر من غير فلتر من غير تجميل .. الحلو و الوحش .. مافيش بلد كامله و كلها حلو .. و في نفس الوقت مافيش بلد وحشه جداً .. حابه اصورلكوا مصر بعيون (نهال) عشان انا زيي زيكوا بزور اماكن سياحيه لاول مره زي السائح بالظبط و تقريبا ساعات بحس اني مش مصرية عشان كل يوم بعرف عن بلدي اكتر و اكتر ! اتمني تستمتعوا بالمواضيع اللي بكتبها عن مصر !