معروف أن ثقافة (الدُمي) أو العرايس موجوده في كل دوله .. زي مثلاً العرايس الروسي اللي إسمها (دمية ماتريوشكا) اللي كلنا عارفينها بتبقي مجموعه من العرايس متداخله في بعض من الحجم الكبير لأصغر حجم والدمية دي بترمز للخصوبة و الأمومه..
والعرايس الياباني (نينجيو 人形) اللي أشكالها كتيرة جداً وكنت حضرت ليها معرص أتعمل في شهر 5 اللي فات و تقدروا تشوفوا المقالة من هنا:
https://egyptopia.net/ja/article/Ningyo-Cairo
بس النهرده في المقاله حنتكلم عن أهم العرايس في مصر و معروفين جداً في الثقافه المصرية و همه (عروسه المولد) و الأراجوز وعرايس أوبريت الليلة الكبيرة.
أول حاجه حعرفكوا عليها هي عروسه المولد:
عروسة المولد هي أيقونة شعبية مصرية خالصة تُصنع للاحتفال بذكرى المولد النبوي الشريف، وبترتبط بتقديم التماثيل المبهجة للأطفال والتهادي بين الأقارب والمخطوبين. يرجع أصلها التاريخي إلى العصر الفاطمي في مصر، حيث ابتكر ديوان الحلوى التابع للخليفة قوالب سكرية على هيئة عروسة وحصان لتوزيعها على الشعب وإدخال البهجة قلوبهم.
ومن هنا بقيت جزء لا يتجزأ من أحتفالية المولد النبوي
مراحل تطور عروسة المولد:
- العروسة الحلاوة: التصميم التقليدي المصنوع من السكر والماء المغلي المصبوب في قوالب خشبية، و بيتساب لحد ما يبرد و بعدها بيتم أخراج الدمي من القوالب دي و تلوينها و تزيينها بالورق الملون.
- العروسة البلاستيكية: بدأت في الظهور مع تطور المجتمع و عصر العولمة، بتبقي عروسة لابسه فستان من قماش التول والستان وتتميز بعمرها الطويل كقطعة ديكور. و أشكالها و أحجامها كتيرة جداً جداً و مازالت محتفظه بشكلها التقليدي علي عكس فانوس رمضان اللي بقي شكله متغير شويه و بقي فيه فوانيس بتتعمل علي شكل شخصيات الكارتون بتتعمل للأطفال مثلاً.
فا دايماً في يوم مولد النبي حتلاقوا في كل محلات الحلويات و الشوارع شكل العروسه المميز ده.
تاني عروسه هي الأراجوز:
الأراجوز المصري هو أبرز فن من الفنون الشعبية و التراث اللامادي في مصر .. هو عبارة عن مصر عرائس تفاعلي تقليدي بيعتمد علي دمية بتتلبس في الأيد ونجحت مصر في تسجيله في نوفمبر عام 2018 ضمن قائمة اليونسكو للتراث الثقافي غير المادي.
· المواصفات الفنية و الشكلية للدمية:
1- الرأس: بيتعمل من خشب خفيف وصلب وبيترسم عليه ملامح حادة وبارزة.
2- الملابس: بيلبس جلابية حمراء وطويلة و علي راسه بيبقي لابس طرطور أحمر ( طاقية حمراء علي شكل مثلث).
3- الأيدي: كانت بتتصنع من الخشب زمان عشان يضرب بيها أثناء العرض الفُكاهي.
4- الامانة(الزمارة): قطعة معدنيه (ستانلس أو نحاس) بيحطها الشخص اللي بيحرك العروسه في بقه عشان يغير صوته و يديله صوت بنبرة حاده و مميزة.
· بترمز لأيه عروسه الأراجوز؟
ليها أهداف وأهمية مجتمعيه كبيرة :
1- النقد الأجتماعي: بيناقش الاراجوز قضايا الناس البسيطه ومشاكل المجتمع اليومية بأسلوب ساخر و فكاهي و جرئ.
2- الكوميديا والتفاعل مع الجمهور: يعتمد العرض علي الأرتجال والتفاعل المباشر بين دمية الاراجوز والجمهور(سواء كانوا كبار أو أطفال).
3- التنوع الثقافي: بيقدم روايا شعبية علي شكل قصص كوميدية مسرحيه.
الاراجوز في الفن و السينما:
· (محمود شكوكو) :من أشعر الفنانين المصريين اللي ارتبطوا بفن عروسه الاراجوز وطلع كتير في أفلام بيقدم العروسه دي كجزء من الفيلم.
· صابر المصري: بيٌلقب بشيخ لاعبي الأراجوز كأحد أبرز الأشخاص اللي قدموا الفن ده.
· الأفلام السينمائية: ظهر الفن في أعمال كلاسيكية مثل فيلم "الزوجة الثانية". كما قدم الفنان عمر الشريف بطولة فيلم شهير يحمل اسم (الأراجوز) عام 1989، والذي جرى ترميم نسخته رقمياً للحفاظ على قيمته التراثية.
تالت وأخر عرايس هي عرايس أوبريت الليله الكبيرة:
"الليلة الكبيرة" هي أشهر أوبريت للعرائس في تاريخ المسرح المصري. وأشهر عرايس الأوبريت التي شكلت وجدان الجمهور:
عرايس الأوبريت الأساسية
- الأراجوز: الشخصية الشعبية الساخرة والمحبوبة.
- المعلم: صاحب القهوة الذي يدير المكان.
- الأفندي: يمثل الشخص المتعلم وسط المولد.
- العمدة: يمثل هيبة الريف وزوار المولد.
- بائع الحمص: يعكس الأجواء التجارية للمولد.
- بائع اللعب: ينادي على ألعاب الأطفال بالمولد.
- المداح: المنشد الذي يمدح الرسول الكريم.
- لاعب السيرك: يقدم فقرات القوة والشجاعة.
- شجيع السيما: شخصية "عنتر" الهزلية بالسيرك.
- الزبون: الذي يدخل في نقاشات كوميدية.
- المنادي: الذي يعلن عن بدء العروض.
مبدعو الأوبريت
- الكلمات: صلاح جاهين.
- الألحان: سيد مكاوي.
- الإخراج: صلاح السقا.
- تصميم العرايس: ناجي شاكر.
ده غير ان فيه عرايس مشهوره جداً جداً في مصر بسبب ظهورهم في أعمال تيلفيزيونية زي (بوجي و طمطم) مثلاً.
عروسه المولد لسه موجوده لحد يومنا دلوقتي بس الأراجوز هو اللي تقريباً مختفي خالص خصوصاً أن كلمه الأراجوز أتحول معناها من حاجه بتعبر عن العروسه ذات نفسها لاهانه زي مثلا أما تقول لحد : أنت أراجوز .. بيبقي معناها أنت شخص تافه .. مالكش لازمه أو مجرد مهرج جي تهزر.
أتمني يتعمل حاجه تخلي عروسه الأراجوز ترجع بشكلها الفكاهي المتعارف عليه.