لو عايز تتكلم عربي بجد… ابدأ بالمصري 🇪🇬

اللغة العربية فيها لهجات كتير جداَ ! بس قليل منها مناسب للأستخدام اليومي. تعالوا نشوف لو أنا عاوز أتعلم اللغة العربية أبتدي منين؟ والفرق بين اللهجات وليه في وجهه نظري بنصحكوا تتعلموا اللهجة المصرية.

في الحقيقة أجانب كتير أما بيقرروا يدرسوا اللغة العربية أول حاجه بتيجي في بالهم: أبتدي منين ياتري؟! اللغة العربية قد تبان لغة أو حاجه واحدة بس في الحقيقة أن اللغة العربية الفصحي حاجه والعربي المستخدم في الحياة اليومية حاجه تانيه! ومش بس كدا ده الدول العربية والشرق الاوسط فيه لهجات كتير جداً جداً لدرجه إننا مش بنفهم بعض حتي لو اللي بيتسخدموه لغة عربية بس كل لهجه مختلفه عن التانية ! وكتير قوي من الأجانب بيتفجأوا أما بيدرسوا لغة عربية بكمية اللهجات اللي موجودة فيها. وكمان كتير من الأجانب بيبتدوا دراسه اللغة العربية الفصحي وهمه مش مدركين أن فيه فجوة كبيرة بين اللغة العربية الفصحي والكلام المستخدم في المحادثات اليومية...

تعالوا الاول نفهم أيه هي اللغة العربية الفصحي ... اللغة العربية الفصحي هي اللغة العربية الستاندرد اللي بتستخدم في الخطابات الرسمية.. الكتب.. الاخبار.. الجرنال..وهي مفهومه في كل الدول العربية بس مش عاوزه أصدمك و أقولك أنه نادر جداً تلاقينا بنتكلم اللغة العربية الفصحي في حياتنا اليومية! يمكن بنستخدم بعض الكلمات أو المصطلحات ولكن باقي الكلام كله لغة عامية.. هنا يوصلنا أنه طريقة كلامنا في الحياة اليومية بنقول عليها : اللهجه العامية .. اللي هو الكلام المستخدم في حياتنا اليومية.

وكتير قوي من دارسي اللغه العربية أول ما بينزل أي دولة عربية ويسمع الكلام اللي بيستخدموه يومياً أنه مش فاهم وبيتصدم وبيقول: أنت بتقول ايه أنا مش فااااهم! وده عشان اللهجه المصرية مختلفه تماماً عن اللهجه الجزائرية أو السعودية أو التونسية .. والحقيقه أحنا كمان كمصريين مش بنفهم همه بيقولوا أيه معظم الوقت مع أنه عربي.

بيختلف قرارك في دراستك أنهي لهجه من اللهجات في اللغة العربية علي حسب هدفك ! حتعيش في أنهي دوله عربية .. يعني لو مثلاً ناوي تعيش في السعودية فا اللهجة السعودية أقرب حاجه ليها العربية الفصحي.. بس لو عاوز تريح دماغك فا أنا في وجهه نظري أنك تختار اللهجه المصرية هو أحسن قرار ممكن تاخدة! ليه بقي تعالي أقولك!

1-اللهجة المصرية النحو بتاعنا يعتبر مش معقد قوي وكمان مش بس كدا نطق اللهجه المصرية سهل علي عكس دول كتير!

2- اللهجة المصرية شعبيتها عاليه جداً في الشرق الاوسط وبين الدول العربية و تقريباً كل الناس بتفهمنا بسبب شعبية مسلسلاتنا وأفلامنا المصرية فا ده سهل فهم باقي الدول للهجة المصرية.

3- لهجتنا ممتعه وعندنا تعبيرات ومصطلحات مش حتلاقيها في أي دوله عربية .. أحنا شعب معروف أننا عندنا حس فكاهي عالي فا حتستمع باللهجه المصرية جداً أما تعرف تعبيراتنا اللي بنستخدمها كل يوم!

ببساطه لو عاوز تواصل تعلم اللغة العربية بأستمتاع فا بنصحك تبتدي باللهجة المصرية وخصوصاً لو عاوز تستخدمها كلغه للتواصل مش مجرد دراسة أكاديمية .. اللهجة المصرية حتفحلك باب أنك تكون مفهوم في معظم الدول العربية .. تقدر تتكلمها وحتضمن إنك تتفهم !

ولو الموضوع ده عجبك، اقرأ كمان: المحاكاة الصوتية في اللهجة المصرية - الجزء الثاني! وكلمات ليها نفس النطق بس المعني مختلف تماماً! اللهجة المصرية X اللغة اليابانية (الجزء التاني)