إيه هو الفرانكو؟ الفرانكو: لغة الشات المصرية!
الفرانكو آراب اللي بنكتب بيه على الواتساب والفيسبوك: إيه أصله؟ وحروف الفرانكو معناها إيه؟ وإزاي اليابانيين اللي بيتعلموا اللهجة المصرية ممكن يستخدموه؟
بتكلم صاحبك المصري على واتساب أو الفيسبوك وفجأة يبعتلك حاجة زي 3amel eh? أو 7abibi أو ma3lesh، فتقعد تبص وتقول: «إيه ده؟! »
دي حاجة اسمها في مصر «فرانكو» أو «فرانكو آراب»، يعني بنكتب العربي بحروف إنجليزي، وبنستخدم أرقام بدل بعض الحروف اللي مالهاش صوت مشابه في الإنجليزي. وفي البلاد اللي بتتكلم إنجليزي، الطريقة دي بتتسمى كمان Arabizi.
وأنا كمصرية لسه بستخدم الفرانكو عادي جدًا كل يوم في الشات مع أهلي وأصحابي.
في المقالة دي حنتكلم عن الفرانكو المصري، إزاي بيتكتب وليه بنستخدم الأرقام فيه، وكمان هنتعلم شوية كلمات وجمل تقدر تستخدمها فورًا في الشات!
يعني إيه فرانكو؟
الفرانكو ببساطة هو إننا نكتب العربي بحروف لاتيني بدل الحروف العربية.
بس العربي فيه أصوات مش موجودة في الإنجليزي، فعشان كدا استخدمنا أرقام بدل بعض الحروف. والأرقام دي غالبًا اتاختارت عشان شكلها أو صوتها قريب من الحرف.
مثلًا ع بنكتبها 3، عشان شكل الـ3 قريب من شكل حرف ع لو اتقلب، وح بنكتبها 7.
يعني الأرقام اللي بتشوفها وسط الكلام مش أرقام عشوائية، كل رقم وراه حرف عربي!
طب الفرانكو ظهر إزاي؟
زمان، قبل ما الكتابة بالعربي على الموبايلات والكمبيوتر تبقى سهلة زي دلوقتي، كانت ساعات مافيش كيبورد عربي، أو الحروف العربية ما كانتش بتظهر صح.
فمع انتشار الـSMS والإيميلات والشات، الشباب بدأوا يكتبوا العربي بحروف إنجليزي، واستخدموا أرقام للأصوات اللي مالهاش مقابل سهل بالإنجليزي.
دلوقتي طبعًا تقدر تكتب عربي بسهولة جدًا من الموبايل، لكن الفرانكو لسه مستخدم في الشات، خصوصًا بين الصحاب، لأنه سريع وكاجوال وبيخلي الكلام شكله غير رسمي.
جدول حروف الفرانكو
| بالياباني | الحرف العربي | الفرانكو | ملاحظة |
|---|---|---|---|
| のどで止める音 | ء / ق | 2 | في مصر القاف غالباً بتتنطق همزة، فبنكتبها 2: 2olt (قلت) |
| アイン | ع | 3 | 3arabi (عربي) |
| ハー（強い） | خ | 5 | 5alas (خلاص)، وناس بتكتبها kh |
| ハー（息） | ح | 7 | 7abibi (حبيبي) |
| ガイン | غ | gh | ناس قليلة بتكتبها 8 |
| シーン | ش | sh / ch | shokran (شكراً) |
أشهر كلمات الشات بالفرانكو
| بالياباني | بالعربي | بالفرانكو | ملاحظة |
|---|---|---|---|
| 元気？ | إزيك | ezayak / ezayek | للراجل / للست |
| 調子どう？ | عامل إيه / عاملة إيه | 3amel eh / 3amla eh | |
| 友よ | حبيبي / حبيبتي | 7abibi / 7abibti | بين الصحاب عادي جداً |
| 気にしないで | معلش | ma3lesh | أشهر كلمة مصرية |
| さあ | يلا | yalla | |
| OK | تمام | tamam | |
| なんで？ | ليه | leh | |
| （笑） | ههههه | hhhhh | زي "www" عند اليابانيين |
حوار قصير على الواتساب
ساكورا (صاحبتي اليابانية): ezayek ?أنا: el7amdulellah! enti 3amla eh?ساكورا: tamam. ana bat3allem 3arabi masri delwa2ty!أنا: wallahi? gamed geddan! hhhhhساكورا: ma3lesh lw fe 8alat 😅أنا: la2 kwayesa awi, yalla kamli!لاحظ إن ساكورا كتبت "8alat" (غلط) بالـ8، وده استخدام نادر، بس بنفهمه عادي. ودي أحلى حاجة في الفرانكو: طالما الكلام مفهوم، مفيش غلط.نصيحة لليابانيين اللي بيتعلموا اللهجة المصرية:
الفرانكو ممكن يبقى كوبري حلو للمبتدئين قبل ما يتعلموا الحروف العربي، بس لازم يسمعوا نطق الـ3 والـ7 من مصري، لأن الرقم مش بيوصل الصوت. وأحسن بداية للهجة نفسها مقالة لو عايز تتكلم عربي بجد… ابدأ بالمصري، وبعدها التحيات الأساسية.إمتى نكتب بالفرانكو وإمتى لأ؟:
الفرانكو حلو وخفيف، بس مش لكل حاجة. في الشغل، والإيميلات الرسمية، والورق الحكومي، وأي حاجة فيها احترام للطرف التاني، لازم نكتب بالعربي. لو بعت لمديرك "ok ya 7abibi" غالباً مش حتعدي على خير! أما مع الصحاب والأهل والجروبات، فالفرانكو ماشي جداً.وفيه ناس كتير في مصر، خصوصاً الكبار ومدرسين اللغة العربية، شايفين إن الفرانكو بيضعف علاقة الشباب بالحروف العربية، وإن الجيل الجديد بقى بيكتب العربي بصعوبة. وأنا شايفة إن عندهم حق في جزء من الكلام ده، وعشان كدا بحاول أوازن: الفرانكو للدردشة السريعة، والعربي لأي حاجة تانية. ومع انتشار الكيبورد العربي على كل الموبايلات، ناس كتير رجعت تكتب بالعربي تاني حتى في الشات.واللي لاحظته في اليابان إن اليابانيين برضه بيفرقوا بين الكتابة الرسمية والكتابة الكاجوال بشكل كبير جداً، وعندهم مستويات للاحترام في الكلام نفسه، فبيفهموا بسرعة فكرة إن الفرانكو "لغة صحاب" مش "لغة شغل".مقالات ممكن تعجبك
- إن شاء الله ومعلش ويلا: جمل المصري اليومية!
- يا سلام ويا نهار أبيض! ردود الفعل باللهجة المصرية
- الأرقام العربية الأصلية: ١٢٣ ولا 123؟
ولو الموضوع ده عجبك، اقرأ كمان: المحاكاة الصوتية في اللهجة المصرية - الجزء الأول! وكلمات ليها نفس النطق بس المعني مختلف تماماً! اللهجة المصرية X اللغة اليابانية(الجزء الأول)
