النهرده حابة أتكلم عن تعبير مصري ممكن يعتبره البعض مش محترم ( هو فعلاً لفظ مش محبب أنه يتقال بس هو مش شتيمة بس لفظ غير محبب في الأستخدام ولكن هو مستخدم كنوع من أنواع الاهانة في اللهجه المصرية).

الهدف من المقالة ترفيهي بحت أنا عارفه أن أول حاجه الواحد بيحب يعرفها في أي لغة هي الأهانات في اللغة دي من باب الترفيه مش أكتر. ( أنا شخصياً من الناس دي)

ومن ضمن التعبيرات دي في اللهجة المصرية هو مصطلح : صبي العالمة!

خلينا الأول نشرح الكلمتين اللي بيتكون منهم المصطلح أو التعبير ده..كلمة "صبي" معناها في الأصل طفل صغير، لكن في بعض السياقات ممكن تشير إلى شاب صغير في السن. أما كلمة "العالمة" فهي تعبير كان بيُستخدم زمان في مصر ومعناه (الراقصة الشرقية).لكن إستخدامة بقي أقل في الوقت الحالي.

·        شرح المصطلح:

زمان ده شغلانه (الراقصة الشرقية) كان عادي ومنتشر جداً عن دلوقتي وكان ساعتها الراقصة دي بيبقي معاها مساعد (الصبي) بيساعدها في حاجات كتير قوي زي أنه ينظم مواعيدها.. يلم الفلوس من الزباين.. يعني من الأخر كان بيساعدها في أي حاجه تطلبها منه. والمساعد دي بقي أسمه (صبي العالمة).

بس مع مرور الوقت المصطلح دة بقي يستخدم بمعني سلبي أو إهانة... فا التعبير ده بقي بيعبر عن الشخص اللي بيطيع أي أوامر بتتقالة من غير مايفكر وبيعمل أي حاجه تتطلب منه. وبمعني أبسط التعبير ده بقي بيعبر عن الشخص اللي مالهوش أي رأي مستقل أو ماعندهوش شخصية وماشي ورا كلام أي حد من غير مايكون عنده أي تفكير مستقل.

أعتقد في اللغة اليابانية فيه نفس التعبير بيدي نفس المعني ده زي مثلا  イエスマン (Yes Man)وده تعبير مشهور و مستخدم بكثرة في اللغة اليابانية وهو الشخص اللي بيقول (نعم) دايماً لرئيسة أو شخص عنده سُلطه أقوي منه وبينفذ كل اللي بيتطلب منه بدون إعتراض. وبرضه فيه (言いなりになる人iinari ni naru hito) ومعناها شخص بيعمل كل حاجه بتتقالة بدون نقاش.

و أخيراً مصطلح (操り人形 ayatsuri ningyou) ومعناها : عروسه أو دمية بيتم تحريكها بالخيوط اللي هو شخص اللي بيتحكم فيه الناس.

ممكن كل لغه وثقافه ليها تعبيرات مختلفه عشان توصف حاجه بمعني (صبي العالمة) حتي لو أختلفت الكلمات بس المعني واحد برضه