المفتقة المصرية:قنبلة طاقة متوارثة ومحبوبة عبر السنين

المفتقة المصرية من الأكلات التقليدية اللي تُعتبر جزءًا لا يتجزأ من التراث الغذائي في مصر. بتتميز المفتقة بقيمتها الغذائية العالية، وبتُستخدم كمصدر غني للطاقة والعناصر الغذائية الأساسية، وده اللي بيخليها محبوبة جداً خصوصاً في فصل الشتاء.

الأكله دي بتتوارثها الأجيال بس حالياً Gen Z والأجيال الجديدة بمعني أصح ماتعرفش الأكله دي أصلاً ! الأكله دي أنا كنت باكلها وأنا صغيرة بس بطلت أكلها من زمان عشان سعراتها الحرارية عالية قوي! و هي مناسبه أكتر للناس اللي عاوزه تزود وزنها ولكن مش مستحب حد مريض بمرض السكر أنه ياكلها بالرغم إنها مفيدة بس حتكون مضرة عليه.

المفتقه ممكن تتعمل في البيت بس أنا بصراحه عمري ما عملتها بس حابه أقول مكوناتها:

عسل إسود,مسحوق الحلبه,سمنه وزبده,دقيق,سمسم,ومكسرات زي الفول السوداني.

الاكله دي بتتاكل جوه ساندوتش أو بالعيش. وبتتباع كمان في السوبرماركت وعند العطار.

هي مش مشهوره خالص برا مصر أو مش معروفه زي مثلا أكلات كتير مصرية, بس انا حبيت أعرفكوا عليها عشان شويه شويه الاكل ده بينقرض وماحدش حيسمع عنه بعد كدا.

أعتقد المطبخ المصري الأكل فيه دسم وسعراته الحراريه عالية عشان زمان الناس كانت بتتحرك كتير وماكنش فيه وسائل تسهل العيشه زي دلوقتي .. كل حاجه دلوقتي تقدر تعملها بالتليفون وانت قاعد في البيت .. فا عشان كدا أكلات زي المفتقة إبتدت تختفي وماعدتش مناسبه للايف ستايل الناس دلوقتي اللي بتتجه لحياة صحيه أكتر .. بس مش حننكر أن أكله زي المفتقه صحيه ومليانه فيتامينات و عناصر غذائية عالية خصوصاً أن العسل الأسود مفيده جداً وغني بالحديدو بيساعد في الوقاية من فقر الدم.. زمان كان لايف ستايل حياتنا متوازن.. الاكل الصحي الدسم و الحركه الكتير أثناء اليوم عشان نقضي أشغالنا.. حالياً يمكن الموضوع مابقاش متوازن قوي ! بس مافيش مانع نجرب منها كميات صغيرة عشان ماننساش طعمها! و الاكله دي كمان بيستحب أنها تتاكل في الشتا عشان بتدفي جداً ! لو جاتلكوا فرصه تجربوها وانتوا في مصر متأكدة أنها حتعجبكوا.