الرز باللبن من الحلويات المنتشرة في البلاد العربية و بالأخص في مصر.. حلويات سهله جداً ومكوناتها متوفرة في كل البيوت ومش مكلفه وفوق ده كله مش بتاخد وقت في التحضير.
الحلويات دي مافيش حد في مصر مابيحبهاش.. وحتي لو بتشتريها جاهزة من المحل بتبقي مش غالية وعادة دايماً اما بتروح في تاكل كشري في محلات الكشري دايماً حتلاقي عندهم تلاجه فيها رز باللبن بحيث أن دايماً بعد الكشري المصريين بيحبوا ياكلوا حاجه حلوة بعد أكله الكشري الحرشه دي فا بيكون دايماً هو الرز باللبن بيتاكل بعدها عشان بيبقي بارد وبيدي إحساس حلو قوي أما تاكله بعد الكشري.
بمكونات بسيطة جداً .. رز ,سكر, لبن, و شويه إضافات تانيه حتعمل أحلي حاجه حلوة!
زي ما بحضرة في الفيديو.. حنحتاج نص كوب أرز (مغسول) أو كوباية حسب الكمية اللي عاوز تحضرها وحنسوي الرز عادي جداً كأنه رز مسلوق ونسويه في كوب مياة.. حنضيف علي الرز لتر لبن كامل الدسم ونضيف السكر (حسب الرغبة) ومعلقه صغيرة فانيليا مع التقليب المستمر علي نار هادية.. و ضيفت عليها كريمه عشان تزود دسامتها و بكدا برضه خليتها .. قنبله سعرات حراريه! بس ومالو تستاهل! .. فيه برضه وصفات بتتعمل ببودره الكريم شانتيه فا اللي متوفر عندك إستخدمه.. وبعدها بندوب معلقتين صغيرين من النشا في مياة بارده ونضيفها علي خليط الرز والسكر واللبن عشان يتقل القوام.
بنصب الخليط في أكواب تقديم زي ماهو موضح في الصورة.. و بنزينه من فوق بمكسرات و قرفه (إختياري) أو بيتاكل كدا من غير إضافات. وبيتساب يبرد في التلاجه 6 ساعات تقريباً.
كمان فيه أوبشن أنك تدخله الفرن بس يكون في طاجن (زي اللي في الصورة) لحد ما وش الطاجن يبقي لونه دهبي غامق فا بيبقي أسمه (رز باللبن في الفرن).. عموماً في الحالتين الاتنين طعمهم بيبقي تحفه!
وأنا مره كنت رحت أكل كشري في محل جنب البيت وبعدها طلبت واحده رز بلبن عشان أروح في دنيا تانيه كدا ! و ده بيبقي شكله أما بيتباع في محلات الكشري.
