إتكلمنا في مقالة سابقة عن شهر رمضان في مصر وليه شهر رمضان مميز في مصر بطقوسة وعاداته ومظاهر الأحتفال بيه(https://egyptopia.net/article/Ramadan)
.. بس في المقاله بتاعت النهرده حنتكلم عن المشروبات المميزة اللي بتعتبر جزء من هوية شهر رمضان وحتلاقيها علي سفرة الفطار في رمضان في كل بيت مصري.
المشروبات اللي بنكسر بيها الصيام في رمضان بتبان بشكل مميز عن بقيه السنه (هي موجوده طول السنه بس في الشهر ده بالذات بتتباع بزيادة عشان دي اللي دايماً بتتقدم وقت الفطار).. ولازم كل بيت علي الفطار بيبقي محضر المشروبات دي عشان دي اللي بتروي عطش الصائمين من صيام طويل طول اليوم. فا يلا بينا نشوف أكتر مشروبات مميزة في شهر رمضان:
1- مشروب قمر الدين:
مشروب قمر الدين بيبقي عبارة عن رقائق مجففة مصنوعة من مشمش مطبوخ ومصفى.. بننقع الرقائق دي في مياة عشان تطري وبعدها بنضربها في الخلاط مع مياة وسكر. أنا شخصياً مش بشربة كتير عشان بحسه مسكر قوي.
2- السوبيا:
هو مشروب طعمه قريب جداً لجوز الهند بيتعمل بطريقه تقليدية بس دلوقتي بيتباع كبودرة جاهزة وبتبقي مسحوق مزيج من الأرز المطحون، جوز الهند، كريم شانتيه، حليب بودرة، سكر، وفانيليا و بيتخلط مع لبن..وممكن تزود السكر حسب الرغبة.
3- الخروب:
هو نوع من انواع الثمار بيبقي بالشكل الموضح في الصورة. بيتغلي في مياة نص ساعه و بيتصفي وبتزود عليه سكر وبيتشرب ساقع. ده من مشروباتي المفضله طول السنه.
4- التمر الهندي:
هو عبارة عن فاكهه استوائية وبتطلع الشجرة قرونًا بنية اللون تحتوي على اللب الليفي اللي بيتم إستخدامة. التمر الهندي بيتنقع في مياة سخنه 4 ساعات وبيتهرس و بيتصفي و بيتزود عليه سكر وبيتشرب ساقع. طعمه بيجمع شويه بأنه مزز و مسكر.
5- الكركدية:
هو نبات عشبي شبه الورد كدا مميز باللون الأحمر الداكن .. بيتحضر بأنه بتغلي أوراق النبات ده مجففه و بتزود عليه سكر .. ممكن يتشرب ساقع أو سخن.
6- العرقسوس:
هو نوع من أنواع النباتات (مش عارفه بحسه شبه الخشب كدا) برضه بيتنقع في مياة سخنه 4 ساعات وبيتصفي وبيتحط عليه سكر و بيتشرب ..بصراحه مش بحب المشروب ده خالص كمصرية ! بس في مصر اللي بيحبوة كتير جداً مش عارفه ليه !
دول من أهم المشروبات اللي شهر رمضان بيتميز بيهم حتلاقيهم بيتباعوا في السوبرماكت يا أما بحالتهم الاصليه سواء أعشاب أو الثمار مجففه.. او علي شكل بودره زي السوبيا والتمر هندي.
مشروب قمر الدين دايماً بيتباع بالشكل في الصورة ده:
الكركدية كمان بيتباع علي شكل فتل شاي زي ليبتون كدا بس انا بفضل أما بعمله يكون بشكله المجفف.
المشروبات دي كلها بحبها بصراحه بس مش بشرب السوبيا ولا العرقسوس عشان مش من مشروباتي المفضله بس ممكن يعجبكوا.
الميزه أما بتعمل المشروبات دي بتعملها في البيت بنفسك بتقدر تتحكم في كمية السكر اللي تحطها أو ممكن تشربها من غير سكر خالص علي عكس لو أشترتها جاهزة من برا ساعات بتبقي كمية السكر كبيرة شويه.
كمان بعض المشروبات دي بتتباع في الشارع من راجل بيبقي شايل حاجه أسمها قربه أو زي ما موضح في الصورة بيبقي زي أبريق أو وعاء كبير نحاس كدا ومزخرف والبياع ده بيبقي لابس زي تراثي مميز عبارة عن (صديري) وطربوش وبيصب مشروبات زي (العرقسوس أو الخروب أو التمر الهندي) في أكواب إزاز و البياع المتجول ده هو أيقونة رمضانية وشعبية في الشارع المصري بالذات في شهر رمضان وبيبقي متواجد قدام المساجد والمناطق الزحمه ووسط البلد.
