شوربه الملوخيه ! الاكله معشوقه الشعب المصري ! اللي أول ما بتعملها بتقلب ريحه البيت المصري بالدفء .. تتاكل في الصيف و الشتا و في أي وقت ! أكتر اكله سريعه في التحضير!
الملوخيه بالطريقه المصرية طعمها مميز جداً ! و من زمان كانت جزء لا يتجزأ من أكل المصريين القدماء و ليها نقوش علي المقابر و المعابد بتاعت المصريين و كانت بتتسمي (خيا) أيام الهكسوس والكلمه دي معناها (سام) عشان كانوا فاكرين ان النبات ده مضر و سام و يقال إن الهكسوس أجبروا المصريين على أكلها، ومن هنا جاءت تسمية "ملو خية" (كلوا الخية)، واكتشف المصريون فوايدها بعد كدا عشان غنية بالعناصر الغذائية!
وكعادة مصر كانت هي نقطه إنطلاق الاكله دي لجميع الدول العربية بعد كدا ( السودان-الاردن- لبنان-تونس-المغرب إلخ). وكل دوله ليها طريقتها في عمل الملوخيه بس الاصل إحنا !
إشتهرت أنها أكله الملوك ويقال ان كان أسمها في الاول (ملوكية) و جايه من كلمه (ملوك) و بعدها اتغير الاسم اللي متعارف عليه دلوقتي و هي الملوخيه! و الاكلة دي كانت الملكه كيلوباترا بتعشقها !
الملوخيه نبته و زمان ولحد دلوقتي كان بيتم تقطيع ( تخريط ) الملوخيه .. بس حالياً عشان ماحدش بقي عنده وقت لكدا فا هي بتتباع في المحلات مجمده و عشان كدا بقي تحضيرها سهل و سريع جداً !
طريقه التحضير في الفيديو .. الفيديو كرينج شويه 😊 مش حتاخد منكوا وقت كتير في تحضيرها... المكونات اللي حتحتاجوها :
· كيس ملوخيه مجمد.
· شوربه فراخ أو لحمه ( بتتعمل الشوربة سواء فراخ أو لحمه بأنك تسلق فرخه أو لحمه و تحط في المياة ملح و فلفل وورق لورا و حبهان و بعد نص ساعه أو ساعه تشيل كل حاجه وتستخدم الشوربة).
· التقلية أو طشه الملوخية:
طبعاً الملوخية يعني الطشه والطشه دي اللي هو خليط السمنه أو الزيت اللي بتشوح فيه التوم والكسبرة في طاسه منفصله وأما يبقي لونه دهبي بنحطها علي الملوخية وبنعمل الشهقه دي وهو صوت كدا بنطلعه زي ما تكون متفاجئ و دي عاده مصرية اصيله أما تعمل الملوخية عشان أول ما بتنزل الطشه و بتشهق الملوخيه حتطلع طعمها حلو و خرافي!
· مكونات التقلية أو الطشة:
1. معلقه سمنه كبيرة أو 3 معالق زيت.
2. 3 أو 4 فصوص ثوم.
3. معلقه كبيرة كسبرة.
جربوا تعملوها و انا متأكدة إنها حتعجبكوا!
