من العصر الفاطمي لحد دلوقتي.. حكاية حلويات المولد في مصر!

جاتني الفرصه أني اكتب مقاله صغيرة عن يوم مميز جداً مش بس في مصر بس في كل الدول العربية واليوم ده هو مولد النبي محمد عليه الصلاة و السلام وهو كان يوم 25 أغسطس 2026.

بس أحتفالنا بيه في مصر غير باقي الدول العربية .. هو بيبقي يوم مميز في مصر بسبب أننا بنحتفل بيه بأننا بناكل حلويات !

حنتكلم بالتفصيل عن أشكال الحلويات دي بس الأول نقول شويه معلومات عن نشأة الحلويات دي.

حلاوة المولد أو حلويات مولد النبي نشأت في مصر وبتتاكل وتتباع في الشوارع بشكل خاص في اليوم ده (بس هي موجوده طول السنه عادي ) و أرتبطت الحلويات دي بذكري ميلاد النبي محمد صلي الله عليه وسلم و بيرجع أصل ظهور الحلويات دي في عهد الفاطميين في مصر.

أتكلمت قبل كدا في مقاله عن ثقافه العرايس في مصر و تقدروا تقروا الموضوع ده من هنا:

(https://egyptopia.net/ar/article/Egyptianpuppets)

وعروسه المولد برضه من ضمن الحاجات بيبقي ظهورها مميز في ذكري أحتفال المسلمين بالمولد النبوي بس العروسه دي مش بتتباع غير في المناسبه دي لكن الحلويات اللي بناكلها في مولد النبي بتتباع طول السنه عادي في المحلات.

العروسه دي بتتعمل من السكر وبرضه بتتجاب وبنهادي بيها الاطفال و بتتاكل كمان في الاخر! و فيه منها حالياً بتتعمل من البلاستيك عشان يتم الاحتفاظ بيها.

يوم المولد النبوي بيبقي أجازه رسمية في مصر.. ومش بنعمل فيه حاجه غير أننا بنجيب الحلويات اللي حنعرفها كمان شويه أو بنشتري الحلويات دي و بنهادي بيها قرايبنا وأصدقائنا. ومش بس كدا بيتم تذكير الناس بأخلاق النبي محمد عليه الصلاة و السلام وقيمة الأنسانية.

تعالوا بقي نشوف أنواع الحلويات دي .. بشكل عام كلها بتتعمل من السكر و المكسرات ! وعشان كدا هي قنبله سعرات حراريه كعاده الأكل المصري!

أشهرهم :

· الملبن:

بيبقي عبارة عن سكر أبيض و مياة و نشا درة عشان يديله القوام الطري المطاطي اللي عامل زي المارشملو.. فيه انواع بيبقي ساده ونوع تاني بيبقي فيه مكسرات! وفيه منه ملبن بنكهه الفواكه و متغطي بالسكر.

· الفوليه:

بتبقي عباره عن فول سوداني و سكر مذاب في مياة و عسل جلوكوز.

· السمسمية:

عبارة عن سمسم محمص، سكر، وعسل جلوكوز أو ماء.

· الحمصية:

بتتعمل من الحمص والسكر.

· الدومية الحمرا:

بتبقي ملبن و بيتضاف عليه لون أحمر و جواه فول سوداني أو بندق

· النوجا مكسرات:

بتتعمل من بياض البيض و السكر وعسل الجلوكوز وبيبقي جواها فول سوداني.

وأنواع كتير جداً من أشكال حلويات مولد النبي فيه منها بيتعمل من الفواكه المجففه زي المشمش .. معظمها بيتعمل بخلط مكسرات مختلفه مع السكر و عسل الجلوكوز و اضافات تانيه حسب نوع كل واحده. يعني زي الفوليه والحمصية فيه برضه (اللوزيه) بتتعمل من اللوز مثلاً! و أسامي الحلويات دي جايه متفرعه من أسم المكسرات ذات نفسها .. يعنيAlmond بالعربي يعني لوز فا اسم الحلويات بقي (لوزيه)! بجد الموضوع سهل!

كل الحلويات دي بتتباع جاهزه في محلات الحلويات قرب يوم مولد النبي و كمان حتي لو ماعرفتوش تشتروها في اليوم ده ممكن تلاقوها في محلات كتير بتتباع طول السنه!

ولو الموضوع ده عجبك، اقرأ كمان: الفطار المصري من أيام القدماء المصريين .. الفول والطعمية ولو للجنة طعم… هيبقى الرز بلبن المصري!