العسل الأسود + الطحينة = أغرب ميكس… بس أحلى طعم!

المقالة دي مش عن وصفه أكل بالظبط .. بس هو مزيج بين حاجتين عملوا طعم ما يتوصفش مع بعض ! العسل الأسود مع الطحينة ! ببساطه هي مش وصفه أكل بس تقدر تشتري بكل بساطة الحاجتين دول من أي سوبر ماركت في مصر !

العسل الاسود معروف... بس ايه الطحينة دي ! أكيد فيه يابانيين كتير مايعرفوش ايه الطحينة .. الطحينة دي معجون ناعم بقوام سميك معموله من السمسم المحمص المطحون.

ممكن تعملها في البيت بس وليه التعب ممكن تشتريها من اي محل أو سوبر ماركت بكل بساطه. الطحينة بتدخل في تحضير وصفات كتير منها سلطة بابا غنوج وسلطه الحمص..وبيتعمل منها الحلاوة الطحينية كمان! مشهورة جداً بفوايدها الصحية عشان غنية بالدهون الصحية!

ولكن!...

مش عارفه مين الشخص العظيم اللي قالك أن ميكس العسل الاسود مع الطحينة حيعمل قنبله من الطعم الرائع ده !

الأكله دي بتتاكل يا بالعيش البلدي المصري يا بالفطير المشلتت المصري !

من أجمل الأكلات اللي مش حتلاقي ليها شبه في أي دوله تانية! ميكس طعم العسل الأسود مع الطحينة وتغمس بالفطير المشلتت من الأطباق المصرية الأصيله في مصر لحد النهردة.

طبعاً مش محتاااااجه أقول علي كمية السعرات الحرارية في أكله زي دي ! قنابل نووية من السعرات والسكريات! مبدئياً العسل الاسود سكريات والطحينة دهون والفطير المشلتت بيبقي معمول من الدقيق والسمنة! مافيش بربع جونيييييه بروتين في الأكله دي بس هل تستاهل أنك تنسي الدايت وترمية في الزباله ؟ بصراحه أه!

أول ما تنزل من الطيارة عزيزي الياباني تروح علي أي مطعم مصري بيقدم الفطار المصري الاصيل وحتلاقي في المنيو الفطير المشلتت مع ميكس العسل الأسود والطحينة! دي حاجه لازم تجربها كدا زيها زي زيارة الاهرامات!

ولو الموضوع ده عجبك، اقرأ كمان: الكشري - رحلة التحول إلى طبق وطني مصري! والفطار المصري من أيام القدماء المصريين .. الفول والطعمية