الأهرامات: من أسوأ تجربة لأجمل مفاجأة

اول حاجه بتيجي علي بال اي حد اما بيجي اسم مصر هو طبعاَ الاهرامات و دايما بنشوف تاريخ مصر و خصوصاً الاهرامات بعيون الاجانب و اجانب كتير فاكرين ان عشان انا في مصر فا زرت الاهرامات كتير .. بس في الحقيقه انا كنهال زرت الاهرامات لأول مره سنه 2009 تقريباً و مش حكدب عليكوا ..كانت تجربتي مش حلوة نهائي!

في 2009 أما زرت الاهرامات كانت أول مره ليا كمصريه أزورها ... ناس كتير حتفتكر سبب عدم زيارتي ليها أن عشان مكانها بعيد عليا او اي حاجه بس في الحقيقه يمكن عشان الواحد عايش في مصر كمصري مش بيحس بقيمه الحاجه اللي عنده ومش بيزور الامكان التاريخيه أو بيتعرف علي تاريخ بلده بسبب انه متواجد في نفس المكان اللي فيه الحاجه..

ماعلينا ...أما رحت زرتها أول مره كانت تجربه مش لطيفه عشان أسباب كتير قوي الكل أعتقد عارفها ومر بيها هو أولاً ان هناك كان فيه مضايقات كتير من البياعين و الناس اللي مسؤوله عن ركوب الجمال وألاحصنه والاسعار كانت غاليه و فيه نصب كتير والمعامله ماكنتش حلوه .. غير حوادث التحرش اللي حصلت كتير لاجانب .. بس انتوا مش لوحدكوا انا كمان كمصريه إتعرضت لمضايقات كتير قوي ساعتها وماكنتش مستمتعه خالص بالزيارة. غير انه المكان ماكنش متأمن ولا مُنظم خالص وكان مليان زباله حوالين الاهرامات و من ساعتها كرهت الزياره علي الاهرامات و التجربه كانت نقطه سودا في ذكرياتي وكنت مروحه متعصبه ومتضايقه قوي!

ومن ساعتها مازرتش الاهرامات تاني بس بعدها علي آخر سنه 2025 حصل تعديلات كتيرة جداً شوفتها من ناس عامله فيديوهات علي التيك توك وانه بقي فيه تنظيم أكتر من اول ما بتشتري التذكره من البوابه الرئيسيه الجديده و اللي اسمها (البوابة العظيمة) لموضوع الأسعار بتاعت التذاكر لحد أنهم عاملين أتوبيسات تنقلك بترتيب معين لزيارة كل حته في الاهرامات.. أتعمل تنظيم كبير جدا لمنطقة الأهرامات لدرجه اني ماكنتش مصدقه انها بقيت احسن من الاول بكتير كدا !

دخلت من البوابه الرئيسيه وأشتريت التذكرة بكل سهوله وممكن كمان تشتري التذكرة أونلاين و طبعاً سعر التذاكر للمصريين: 60 جنيهً و الاجانب 570 جنيه. و طبعا فيه ناس بتبقي عاوزه تخش جوه الاهرامات فا دي بيبقي ليها اضافات تانيه فوق سعر التذكره الاساسي.

في المدخل تقدر تستمتع بقراءة معلومات كتير عن الاهرامات و فيه ماكيت كبير بيوضح شكل منطقه الاهرامات كمان! كل الحاجات دي ماكانتش موجوده في الاول !

و بعدها بتقف تستني اتوبيس (ببلاش و بدون رسوم إضافية) ينقلك لكل محطه حوالين الاهرامات وتنزل تتمشي و تاخد الصور اللي أنت عاوزها و بعدها تستني في المحطه و تركب الاوتوبيس يوصلك لمنطقه تانيه لحد ما تخلص لفتك حوالين الاهرامات لحد أبو الهول و بعدها بترجع تاني في نفس الاتوبيسات.

لفيت الاهرامات كلها لحد ابو الهول و كمان مش بس كدا .. حتلاقوا كمان كافيهات ومطاعم بتطل علي الاهرامات جميله جداً بتقدم الاكل المصري التقليدي من الفول والطعميه والفطير المشلتت لجميع أنواع الاكل المصري. بس طبعا الكافيهات دي أسعارها غاليه فا مارحتهاش !

وطبعا لهواه ركوب الجمل و الخيل ! حتلاقوا الناس المسؤوله عن الجولات بالحصان أو الجمل بس طبعا السعر للمصري غير الاجنبي فا حتلاقي انك كأجنبي بتدفع اكتر!

طبعا اتصورت كتير جداً و مش محتاجه أقول أن منظر الاهرامات مهيب جداً و أبو الهول برضه علي الطبيعه منظره تحفه ! و دايماُ بنسال من زمان ازاي الاهرامات إتبنت بالشكل ده وحنقول و حنفضل نقول المخلوقات الفضائية؟ ما أعتقدش ! المصري معروف بجبروته و قوته 😊 !

أخيراً ... أنا كمصرية كنت سعيدة جداً بالتجربة و بالتطور اللي حصل في منطقه الاهرامات .. مابقاش فيه أي مضايقات او تحرشات من أي نوع .. و الحمدلله إنتهي الموضوع ده! ده غير أن الانتقالات والاوتوبيسات كانت مريحه جداً جداً و كل حاجه حصلت بسلاسه و حالياً أقدر أقول بجد إني فخورة جداً بالتحسين اللي حصل في منطقه الاهرامات أهم معلم من معالم مصر واللي بيجيلها الناس من جميع أنحاء العالم عشان يتستمعوا بيها و حقيقي إستمتعت جداً بزيارتي المره دي و أبشركوا إن تجربتكوا لو كانت زمان مش لطيفه ياريت تكرروها تاني حتغيروا رأيكوا!

ولو الموضوع ده عجبك، اقرأ كمان: قصر البارون… غموض، أساطير، وتصميم معماري متميز❕ وهل المتحف المصري في التحرير حيتنسي؟