حقيقي ساعات ببقي محرجه اقولكوا انه في اماكن بزورها في بلدي زيي زيكوا بالظبط زي السائح ! و من الاماكن دي هو هرم سقارة ! و اللي بيتقال عليه برضه هرم زوسر او هرم سقارة المدرج! الهرم اللي إبتدي الحكايه و أبتدي فكره بناء الاهرامات هو الهرم ده ! عشان هرم سقارة أو هرم زوسر بيعتبر أول هرم حجري يتبني في العالم كله! كعاده مصر دايماً هي دايماً بتكون نقطة البدايه لكل حاجه عظيمة و مبهرة !
كانت زيارتي لهرم سقارة مع اصدقائي من كرواتيا و صدقوني كانوا بيقعدوا يسألوني أسأله ماعرفهاش عن بلدي و كنت مكسوفه قوي ! اللي هو يا جماعه بجد انا ذاكرت الكلام ده في ثانويه بس خلصت الامتحان و هوبا نسيت المعلومات علي طول !
منطقه هرم سقارة مش بس عبارة عن هرم زوسر بس .. لا المنطقه واسعه جداً و مليانه مقابر! حقولكوا علي التفاصيل كلها بس قبل ما ابتدي عندي شويه نصايح :
1- تلبس ملابس مريحه جداً لو في الصيف تكون الملابس فاتحه اللون مش غوامق ..ولو شتا خد جاكت و كمامه علشان التراب هناك كتير ! و انا مش بمشي بنصيحتي رحت بلبس كله أسود في أسود ماشاءالله عليا يعني ! عموماً ساعتها كان الجو كويس مش صيف قوي!
2- تاني نصيحه تلبس جزمه مريحه عشان حتمشي كتير جداً جداٍ لأن المسافات بين المقابر و الامكان كبييييرة و بلاش تلبسوا شبشب !
3- و أخيراً لازم يكون معاك مياة وسناك خفيف عشان هناك مافيش أي حد بيبيع اي حاجه عشان حرفياً أنت في الصحرا ! و بالمناسبة البياعين بتوع السوفونيرز هناك كويسين و بيبيعوا بأسعار كويسه بس حاولوا تفاصلوا معاهم في السعر ! المكان هناك امان جداً و طبعا ما تنسوش الصن بلوك !
نرجع لهرم سقارة .. الهرم ده مش واخد حقه بس هو تميزة في انه اول هرم يتبني من الحجر في العالم كله والهرم ده إتبني كمقبرة للملك زوسر و المنطقه دي من أول أهرامات الجيزة لحد سقارة ودهشور بقيت من ضمن قائمة مواقع التراث العالمي لليونيسكو سنه 1979 .
وتحت الهرم ده فيه قبو بعمق 28 متر و فيه غرف دفن فرعون و و عائلتهو معاهم برضه مقتنياتهم الجنائزية.
و المصريين القدماء كانوا من أول الناس اللي استخدموا مصطلح ( المقتنيات الجنائزية) و كان فيه مكان مخصص برضه للقرابين.
حوالين هرم سقارة فيه معابد و مقابر من ضمنها :
· قاعة الأعمدة.
· المعبد الجنائزي.
· مجمع هرم زوسر.
· مصطبة بتاح حتب.
أكتر حاجه عجبتني من ضمن الاماكن دي كلها هي (مقبرة السرابيوم)! أكتر حاجه عجبتني من ضمن الاماكن دي كلها هي (مقبرة السرابيوم)! السرابيوم في سقارة هو مقبرة تحت الأرض كانت تُستخدم لدفن الثيران المقدسة(أبيس) اللي المصريون القدماء يعتقدون أنها تجسيدات للإله بتاح. بعد موت الثور كان يُحنط وبيتحط في توابيت ضخمة هناك، والمكان مهم لفهم عبادة الحيوانات في الديانة المصرية القديمة.
أعتقد انا لو كنت عايشه في الوقت ده كنت حختار أن البومه تكون حيوان مقدس بدل الثور !
عشان البومه بتشوف كويس جداً حتي لو الدنيا بليل ضلمة كُحل و كمان البومه تعتبر صياد ماهر ! بجد مره قريت كومنت ضحكني جدا حد كاتب ان البومه عامله زي ما تكون قطه بس بجناحات و بتطير !
أكتر حاجه بقي غريبة ان وزن كل مقبرة من دول حوالي 100 طن !
يالهوووووي بجد مش متخيله ازاي قدروا ينقلوا مقبرة بالوزن ده تحت كدا ! التاريخ المصري حيفضل لأبد الأبدين حاجه غامضة جدا ! ساعات بحس ان في التاريخ المصري القديم كنا متطورين عن دلوقتي ! مفهوم التطور زمان كان مختلف..في وجهه نظري التطور مش دايماً معناه تكنولوجيا و رتم حياة سريع زي دلوقتي ! زمان يمكن التطور كان في دقه كل حاجه بتتعمل من نحت لهندسه لكل حاجه تقريباً !
عموما دي كانت من اجمل الذكريات بصراحه بالرغم اني مشيت كتير جداً بس كنت مستمتعه !
و دي مجموعه من الصور اللي اتصورتها هناك !
