في المقالة السابقه أتكلمت فيها عن أول ما بوصل أسكندرية أول حاجه بعملها أيه.. تعالوا مع بعض في المقالة دي أقولكوا ألاماكن اللي زرتها في أسكندرية !

أول مكان معانا هو (متحف المجوهرات الملكية)! الحقيقة دي كانت أول مره أسمع و أزور المتحف ده.

v ملحوظه: الأسامي اللي حتلاقوها في المقالة دي أسامي ملوك وأميرات حكموا مصر في فترات مابين 1805 لحد 1952 فا مش حخش في تفاصيل عن معلومات عنهم.

المتحف ده من أثمن المتاحف المصرية, عشان بيضم مجموعة نادرة من مقتنيات أسرة (محمد علي باشا) و(الملك فاروق والملك فؤاد) و(الخديوي إسماعيل و الخديوي توفيق) و كتير من الملوك وزوجاتهم والامراء والاميرات والقصر بيتميز بتصميمة المعماري الأوروبي المميز. المبنى والمتحف ده في الأصل كان قصراً لاحدى أميرات الأسرة العلوية المالكة بمصر. المتحف بيحتوي علي حوالي 11 ألف و500 قطعة.

سعر التذكرة للزائر المصري 20 جنية أما الأجنبي 220 جنية. وحاجه مهمه حابه أنبة عليها أن الدفع بيكون بالفيزا فقط !

معظم التفاصيل المهمه حتلاقوها في الفيديو بس أول ما بتدخل بيدوك كيس تلبسه علي الجزمه بتاعتك عشان تحافظ علي نضافه المكان وجوه المتحف الحاجات المعروضه كتير قوي منها مقتنيات محمد علي باشا زي قلادات مرصعه بالماس والزمرد وحاجات متعلقه بالملك فاروق زي التيجان الملكية وساعات جيب نادرة بتخص سلاطين عثمانيين. ومجوهرات الأميرات الخاصه بالملكة (فريدة) زي الخواتم وسلاسل مرصعه بالألماس.

زيارة المتحف مش حتاخد أكتر من ساعه فا نصيحتي تروحه الصبح علي الساعة 11 مثلاً عشان تتجنب الزحام وبعدها تكمل زياراتك لأماكن تانية في أسكندرية.. يعني مش محتاج تقضي يوم كامل في المتحف هناك.

مسموح التصوير بكاميرات الموبايل (بدون فلاش) ودي معظم الصور اللي صورتها هناك! أتمني تزورا المتحف ده في زيارتكوا للأسكندرية! و نتقابل المقالة اللي جايه في أماكن تانية زرتها في الأسكندرية!