توت توت توووووت تالت مغامرة في مدينة الأسكندرية!
دي تالت مقالة عن مدينة الأسكندرية وإيه المتاحف اللي تستحق الزيارة هناك.. والمتحف اللي حتكلم عنه في المقالة دي مبهر جداً وهو (المتحف اليوناني الروماني).
المتحف اليوناني الروماني في مدينة الأسكندرية هو من أقدم المتاحف الكبيرة والوحيدة اللي تخصصت في الحضارتين اليونانية والرومانية. المتحف ده اُفتتح في عهد الخديوي عباس حلمي الثاني سنه 1895 وتم إعادة إفتتاحه في أكتوبر 2023 بعد ترميم إستمر حوالي 18 سنة.
بدأت فكرة إنشاء المتحف في سنة 1891 لما فكر عالم الآثار الإيطالي "جوزيبي بويت" في أنه يخصص مكان بيحتوي على الاكتشافات الأثرية التي تم الكشف عنها بالإسكندرية عشان يحفاظ على تاريخها الثقافي. المتحف فيه 27 قاعه بتضم حوالي 10 ألاف قطعه أثرية نادرة بتوثق تاريخ الإسكندرية منذ القرن الخامس قبل الميلاد وحتى العصر البيزنطي.
من أهم القطع اللي معروضه في المتحف ده :
· تمثايل للألهه سرابيس وهيرقل.
· تمثال العجل أبيس: منحوتة حجرية نادرة من الديوريت تجسد العجل المقدس، الذي يمثل الإله "أوزيرابيس" (إندماج أوزيريس وأبيس).
· رأس الإسكندر الأكبر.
· لوحة الملكة برنيكى الثانية عمرها 2200 سنة تم العثور عليها فى طماى عام 1923 بمحافظة الدقهلية دلتا مصر. من أغرب المعروضات، وهى لوحة مصنوعة من الفسيفساء تجسد الملكة بيرنيكى، زوجة بطلميوس الثانى أو الثالث، منحوته بشكل واقعى يُظهر جحوظ العينين بسبب إصابتها بمرض الغدة الدرقية.
المتحف يستحق الزيارة جداُ وبيعرض التاريخ في مصر في عصور الرومانية واليونانية وده جانب مهم جداً لا يقل أهمية عن تاريخ مصر القديمة. مش لازم تخصص يوم كامل للمتحف بس هو عشان كبير وتقدر تستمع فيه فا حياخد حوالي ساعه ونص لساعتين عشان تتجول في معظم قاعات المتحف. أتمني تدوا زيارة للمتحف ده أما تيجوا مصر!
حسيبكوا تتفرجوا علي الصور اللي اتصورتها هناك في المتحف ونتقابل في المقالة الجايه في مغامرة ومتحف جديد في مدينة الاسكندرية!
