بجد يا جماعة الواحد مكسوف يقول ان دي كانت أول زيارة ليا لقلعه صلاح الدين وأنا عمري 37 سنه ! بيني و بينها 35 دقيقه بالعربية و دي كانت أول مره أروحها ! عشان تصدقوني أن أنا عايشه في مصر بس أول مره أزور ألاماكن دي زيكوا بالظبط !
قبل ما أخش علي الموضوع وأقول معلومات بسيطه عن القلعه وإنطباعي ...عندي نصيحه واحده .. وهي إنكوا تروحوا في أي يوم غير يوم الجمعه ! الويك إند في البلاد الإسلامية هو علي عكس الدول الأوروبية واليابان فا هو بيكون يوم الجمعه والسبت .. يوم الجمعه إحنا كمسلمين بنصلي صلاة أسمها (صلاة الجمعه) و المسلمين بيتجمعوا وقت الصلاة عشان يصلوا وبعدها يسمعوا خطبه بيقولها الشيخ بتبقي عن مواضيع إجتماعية أو نصائح حياتية وبيربطها بنصايح قالها الرسول (عليه فضل الصلاة والسلام). المهم إني رحت يوم الجمعه ونسيت إنه حيبقي يوم زحمه هناك عشان أولاً ده ويك إند .. وثانياً انه المكان حيكون زحمه عشان صلاه الجمعه اللي بتتعمل جوه المسجد اللي جوه القلعه و إسمه (جامع محمد علي باشا) و حقولكوا معلومات عنه في المقالة هنا .. بس الخلاصه ماتروحوش يوم جمعه عشان حيبقي زحمه عشان دي اجازة و ناس كتير بتحب تقضي اليوم هناك وبيبقي زحمه بالاضافه إلي زحمه الناس اللي رايحه تصلي صلاة الجمعه جوه المسجد ! وأنا مش بحب الاماكن الزحمه عموماً يعني !
المكان سهل تروحه جداً و فيه باريكينج للعربيات .. شراء التذكرة بيكون كاش أو فيزا.
حتمشي كتير فا عشان كدا يفضل تلبس جزمه مريحه.. و ثانياً السيدات يلبسوا ملابس متحشمه مراعاه لوجود المسجد.
قلعة صلاح الدين من أهم معالم القاهرة الإسلامية، ومن أعرق القلاع الحربية التي إتعلمت في العصور الوسطى، و أتاح موقعها الإستراتيجي أعلى جبل المقطم إطلالة رائعة على كافة معالم القاهرة التاريخية، ووفرت الأسوار المنيعة للقلعه مزيد من الحماية ضد أى اعتداء.
أول ما حتخش أماكن فيها مساجد لازم تقلع الجزمه .. و ده من التشابهات بينا و بين اليابانيين تقريباً إننا بنعتبر المسجد بيتنا و لازم نحافظ علي نظافته.
تصميم القلعه مميز جداً و بتطلع علي منظر بانورامي رائع للقاهرة من فوق ممكن تشوفوه و تستمتعوا بيه .. أنا قعدت في المكان اللي فيه المنظر البانورامي ده لحد ما صلاة الجمعه خلصت عشان أعرف اخش مسجد محمد علي باشا وأستمتع بتصميمه و منظرة الرائع من جوه ! المسجد ده برضه له إسم تاني وهو (جامع الألبستر)، وهو تحفة معمارية على الطراز العثماني.
أتبني جوه القلعه شويه متاحف منها: متحف قصرالجوهرة، الشرطة، والحربي.
المتحف الحربي: يعد المتحف الحربي القومي المصري أحد أكبر المتاحف الحربية في العالم بشكل عام وفي الشرق الأوسط بشكل خاص، ويعتبر المتحف الحربي أحد أهم مزارات قلعة صلاح الدين الأيوبي بالقاهرة و في المتحف الحربي بيعرض تطور الأسلحة، الشخصيات العسكرية البارزة، أهم المعارك، والنماذج الحقيقية للدبابات والطائرات، خاصة ما يتعلق بحرب أكتوبر 1973.
متحف الشرطة :يحتوي على قاعات تعرض تاريخ الشرطة منذ العصور القديمة، أدواتها، وأبرز الأحداث والمعارك مثل معركة 25 يناير 1952.
قصر الجوهرة: يمثل جزءاً من العمارة التاريخية بالقصر.
أكتر متحف عجبني فيهم هو المتحف الحربي اللي ما سبتش طيارة ولا دبابه الا أما اتصورت جمبها.
زيارة القلعه ممكن تاخد ساعتين بالكتير .. فا مش محتاج برضه تقضي يوم كامل هناك.
هناك فيه كافيهات عشان لو عاوز تستريح او تشرب حاجه.. الاسعار مناسبه و كمان فيه محلات لشراء هدايا تذكارية و ممكن تحجز مصور ياخدلك صور بروفيشنال بس ماعنديش فكرة التكلفه بكام.
قلعه صلاح الدين جزء من تاريخ مصر الإسلامي .. فا لو كنت مهتم بالتاريخ الأسلامي لمصر بجانب إهتمامك بالحضارة المصرية القديمه فا ده من الاماكن اللي ما تفوتهاش في زيارتك لمصر.
