القاهرة مش بس المتحف المصري الكبير .. فيه برضه متاحف كتير من ضمنها (المتحف القومي للحضارة المصرية) .. المتحف تم افتتاحه في 2021 فا هو يعتبر لسه جديد.
المتحف القومي للحضارة المصرية هو متحف يقع في مدينة الفسطاط بالقاهرة. المتحف فيه 50 ألف قطعة أثرية بتحكي مراحل تطور الحضارة المصرية بالإضافة إلى عرض لإنجازات الإنسان المصري في مجالات الحياة المختلفة منذ فجر التاريخ حتى وقتنا الحاضر، كما يحتوى تحف فنية وآثار من العصر الحجري والفرعوني واليوناني الروماني والقبطي والعربي والعصر الحديث.
المتحف الحقيقه مش كبير نسبياً فا لو فكرت تروحه فا هو مش محتاج اكتر من ساعه عشان تشوف القاعات اللي فيه .. اكتر حاجه عجبتني في المتحف هو قاعه المومياوات و للاسف ممنوع التصوير نهائي فيها.
التذاكر ممكن تشتريها اونلاين من هنا (https://egymonuments.com/nmec)
سعر التذكرة للمصري 90 جنيه و الاجنبي 550 جنيه
قاعات العرض :
مكون من 9 قاعات منها معرض رئيسي عن أهم إنجازات الحضارة المصرية، مع 6 معارض تغطي فجر الحضارة، النيل، الكتابة، الدولة والمجتمع، الثقافة، المعتقدات والأفكار، ومعرض المومياوات الملكية.
قاعة المومياوات: بتضم القاعة 20 مومياء ملكية منهم 18 ملك، وملكتين من الأسرات السابعة عشر حتى الأسرة العشرين. أهم هذة المومياوت مومياء الملك سقنن رع، والملك تحتمس الثالث، والملكة حتشبسوت، والملك رمسيس الثاني، والملك رمسيس الثالث.
فا ما تنسوش تزوروا القاعه دي بالذات عشان مميزه جداً.
في الافتتاح الرسمي للمتحف يوم 3 أبريل 2021 ده كان قبلها اتعمل ليله لا تنسي و هي (موكب نقل المومياوات) اللي كانت احتفالها رهيب و اتذاع علي التليفزيون و كان كل العالم بيتفرج عليها الحفل كان استعراضي وموسيقي عالمي ضخم تضمن موكب نقل 22 مومياء فرعونية ملكية من المتحف المصري بالتحرير بحضور رئيس الجمهورية عبد الفتاح السيسي ومصطفى مدبولي رئيس مجلس الوزراء، وخالد العناني وزير السياحة والأثار.
المتحف كالعاده فيه مطاعم و كافيهات و اماكن تجيب منها هدايا تذكاريه .. و أنا بقي قررت اعمل لنفسي حاجه .. لاقيت محل بيعملك تصميمات علي الورق البردي عليها اسمك بالهيروغليفي بأحجام و تصميمات مختلفه .. فا انا عملت لنفسي حجم صغير و أخترت شكل أنوبيس طبعاً عشان ده الاله المصري المفضل ليا!
و المتحف بيطل علي بحيرة طبيعيه و هي بحيرة (عين الصيرة) والمنظر هناك جميل جداً.
أستمتعت جداً بزيارتي هناك ودي شويه صور من جوه المتحف للحاجات المميزه اللي فيه !
لو اتبقي وقت في رحلتكوا لمصر ماتنسوش تزوروه!
