بعد إفتتاح المتحف المصري الكبير هل حننسي المتحف المصري اللي في التحرير؟ ده السؤال اللي جه علي بالي أول ما المتحف أُفتتح ونقلوا قناع توت عنخ أمون ومقتنياته من المتحف المصري في التحرير للمتحف الكبير! ونقلوا كمان قطع أثرية كتيرة قوي منه لحد بقي يُقال أنه بقي فاضي وتقريباً مابقاش حد يروح هناك!

المتحف المصري في التحرير كان هو الأصل وكان من أكبر وأشهر المتاحف في العالم ومكانة في قلب عاصمه القاهرة – التحرير. في سنه 1983 تم تسجيل مبني المتحف كمبني أثري بأعتبارة قيمة معمارية فريدة من نوعها.

في المقالة دي مش عاوزه أقول مجرد معلومات عن المتحف بل تجربتي هناك أنا زرته حوالي 3 مرات وال 3 مرات كنت لوحدي.

المتحف زيارتة بالنسبه لي كانت جميله لسبب واحد .. أن في 3 مرات دول كنت فاضيه ولاقتني بخش المتحف أتمشي جواة براحتي خالص وأتفرج علي كل الاثار المعروضه.. يمكن أكتر حاجه سلبية ممكن اقولها هو عدم الأهتمام بنضافة المتحف من جوه.. الاثار مالهاش ترتيب معين بل ممكن تقول مرمية هنا وهناك.. الفتارين اللي محطوط جواها المعروضات متهالكه جداً كان نفسي المتحف ده يلاقي الاهتمام اللي يستحقه أكتر من كدا .. أكتر حاجه أستغربتها أنه كان ممنوع تصور أي حاجه في الغرفه المخصصه لعرض قناع توت عنخ أمون ومتعلقاته بس أما أتنقل في المتحف المصري الكبير بقي عادي تصورة! هل فيه سبب معين كان بيتمنع منه التصوير في الأول الحقيقة مش عارفه !

المهم أنا خدت صور كتير قوي لأكتر حد بحبه وهو (أنوبيس). هناك كمان فيه محل سوفونيرز كبير تقدر تشتري منه هدايا تذكارية فرعونية.. الأسعار غالية جدااااا بس ساعتها قمت أشتريت سلسله فيها دلايه علي شكل التابوت اللي كان فيه توت عنخ أمون ! أنا مارحتش المتحف تاني من ساعه ما نقلوا حاجات كتير منه للمتحف المصري الكبير بس سمعت أنه بقي شكله محبط جداً من جوه بعد ما كان بيبقي زحمه من كتر السياح فا كل السياح دلوقتي بقوا يزوروا المتحف المصري الكبير وتقريباً المتحف ده أتنسي! هل فعلا المتحف حيتنسي ولا حيتم تطويرة في المستقبل ويكون واجهه سياحية مميزه ؟ مش عارفه!