في المقالة دي حنكمل جولتنا في إسكندرية وفي المقالة دي حتكلم عن زيارتي لمتحف إسكندرية القومي!
الحقيقة أنا مش حتكلم عن المتحف بس.. ولكن حتكلم عن سكتي للمتحف كمان عشان أنا رحتها تمشية من وسط البلد في أسكندرية لحد هناك وخدت حوالي 40 دقيقه مشي .. حتقولي أيه أكتر حاجه بحب أعملها في أسكندرية حقولك أني بحب أتمشي وبقلل إستعمالي للمواصلات. عشان طول ما بمشي في شوارع أسكندرية بتفرج علي جمال الشوارع فيها وكمان الجو في الشتا فيها بيبقي حقيقي تحفه .. وأنا ساعتها رحتها في الشتا زي ما حتشوفوا في الصور كنت لابسه هودي وجاكت .. الجو كان برد فعلاً.. فا لو قررت تزور أسكندرية في الشتا يا صديقي الياباني أعمل حسابك أنها بتكون برد بجد!
التمشيه في شوارع أسكندرية ليها طعم تاني عن التمشية في القاهرة .. أنا نفسي طول عمري أنقل من عيشتي في القاهرة للأسكندرية عشان بحسها شبهي كدا ... يمكن عشان أنا والدي كان أصلاً منها قبل ما ينقل ويعيش في القاهرة مثلاً!..
قبل ما أروح المتحف رحت فطرت الفطار المصري الأصيل الفول والطعمية وبعدها أتجهت للمتحف أثناء ما بتمشي بحب أصور أي حاجه غريبة زي الحيطه اللي حد راسمها دي ..أو القطط بحب أقعد ألعب معاهم..
:دلوقتي وصلنا للمتحف ! سعر التذكرة للمصري 20 جنية والأجنبي 220 جنيه تقدر تحجز التذاكر أونلاين من علي الموقع ده
https://egymonuments.com/details/AlexandriaNationalMuseum
فا تعالوا نتكلم عن المتحف شويه ..
المتحف في الأصل كان قصر لشخص أسمه (لأسعد باسيلي باشا) وتصميم القصر معمول علي الطراز المعماري الأيطالي سنه 1928. بدأت فكرة تحول القصر لمتحف سنه 1997 أما أشترته الدولة المصرية من القنصليه الأمريكيه اللي كانت واخداة مقر ليها وبدئوا أعمال الترميم لحد ما تم أفتتاحه رسمياً سنه 2003.
المتحف عبارة عن 3 أدوار.
· الدور الأرضي: القسم الفرعوني.
· الدور الأول: القسم اليوناني الروماني.
· الدور التاني: القسم القبطي والأسلامي والحديث.
.webp)
.webp)
طبعاً طبيعي يعجبني المعروضات بتاعت الحضارة الفرعونية بس الحقيقة اللي عجبني أكتر المعروضات بتاعت الدور التالت خصوصاً الحاجات المتعلقه بالعصر الحديث .. حتلاقوا مقتنيات قديمه بتتكلم عن سلسله محلات أسمها (شيكوريل وهانو) وعشان ماتحسش أنك مش فاهم ليه حاطين حاجه زي دي في المتحف فا سلسله محلات (شيكوريل) كانت سلسله متاجر مشهورة جداً في مصر سنه 1887 تأسست علي يد (مورينيو شيكوريل) يهودي أيطالي الأصل وكانت من أفخم محلات القاهرة في وسط البلد وأرتبط أسم المحلات دي بالطبقة الأرستقراطية والعائله المالكة وكانت مشهورة ببيع الملابس والأدوات المنزلية الراقية. زي ماتقول كدا كانت سلسله المحلات دي بتعمل أخر تريندات الملابس زي مثلا زارا ولويس فينتون دلوقتي كدا!
المتحف مش كبير يعني تقدر تقضي فيه مستريح من 30 دقيقه ل 45 دقيقه كفاية عليه.. برا المتحف قعدت أتمشي ولاقيت برضه قطه وهي أول ما شافتني جت نامت علي رجلي! بقيت مش عارفه أقوم أمشي عشان لاقيتها مبسوطه وهي نايمه ومتدفيه في الجاكت!
بعد ما خلصت جولتي في المتحف رحت أشرب قهوة في (كوستا) كان قريب من المتحف برضه وبعدها رحت قعدت في حته أسمها (جليم باي) دي حته علي البحر مباشرة وفيها كافيهات ومطاعم كتير جداً والقعدة هناك جميله جدااااااااااااا بجد ببقي مش عاوزه أقوم خالص منها !
