المتحف المصري الكبير.. تجربة ما تتنسيش!
يعتبر المتحف المصري الكبير، اللي موجود في الجيزة و بيطل علي الاهرامات، متحفاً بيعرض قطعاً أثرية من مصر القديمة. وفي 16 أكتوبر 2024، بدأ افتتاح قاعة العرض الدائمة تجريبياً. كان ساعتها لسه المتحف ما اتفتحش بالكامل زي دلوقتي .. اما رحت الزيارة دي كان اللي متاح لزيارة الجمهور هو مدخل المتحف,والبهو العظيم و الدرج العظيم , و 12 قاعه رئيسيه بتضم أثار من مختلف الاسر المصرية بالترتيب الزمني لكل أسرة. وقتها كان لسه قاعه توت عنخ امون ما أتفتحتش بس ناويه اعمل زيارة تانيه للمتحف عشان اشوف القاعات الجديده اللي اتعملت.
بس خلينا نبتدي من اول ما رحت في 2024, اول حاجه انك تروح هناك سهل جدا سواء بالمواصلات أو بأستخدام ابلكيشينز تأجير العربيه زي أوبر او دي دي, وممكن تروح بعربيتك الشخصيه و حتلاقي باركينج بتدفع تذكره, حوالي 50 جنيه ... شراء التذكره أونلاين فقط من الموقع الرسمي للمتحف الكبير (www.visit-gem.com)
ســاعات الـــعمل:
يوميًا عدا أيام السبت والأربعاء
مجمع المتحف: 8:30 صباحاً إلى 7 مساءً
قاعات العرض: 9 صباحاً إلى 6 مساءً
آخر موعد لشراء التذاكر: 5 مساءً
السبت والأربعاء
مجمع المتحف: 8:30 صباحاً إلى 10 مساءً
قاعات العرض: 9 صباحاً إلى 9 مساءً
آخر موعد لشراء التذاكر: 8 مساءً
التذكره ساعتها كانت ب 200 جنيه للمصريين بس دلوقتي غليت و بقيت 350 ! الحمدالله لحقتها وقت ماكانت رخيصه! المهم في المدخل فيه مسله كبيره ( كل الحاجات دي مصوراها في الفيديو) وبعدها اول ما حتخش المدخل حتلاقي تمثال رمسيس الثاني في المدخل واقف بكل شموخ و كبرياء ! التمثال ده عمل ضجه و جدل كبير قوي انه كان قدام الناس في الشارع في ميدان رمسيس يتشاف ببلاش قبل ما يتنقل المتحف. تمثال رمسيس الثاني اتنقل من ميدان رمسيس (ميدان باب الحديد سابقًا) في 25 أغسطس 2006، إلى موقع مؤقت بجوار المتحف المصري الكبير لحمايته من التلوث، و اتنقل تاني في 25 يناير 2018 في مكانه الحالي في المتحف المصري الكبير. الجدل كان علي ان الحاجه ماكنتش متقدر قيمتها و هي ببلاش و دلوقتي لازم تدقع فلوس عشان تشوفه مع انه كان قادم المصريين يتشاف من غير فلوس ! بس للاسف الحاجه اما تكون ببلاش كدا مش بيتقدر قيمتها ! و دلوقتي اتحط حاجه بتاريخ و عظمه التمثال ده في مكانها الصحيح ! بجد ساعات بستغربنا قوي كمصريين !
و طبعاً انا رحت مخصوص عشان اجر البوث اللي تقدر تصور بيها نفسك ووراك تمثال رمسيس الثاني و الصوره تتبعتلك علي الميل و استخدام الجهاز ده ببلاش ! (التفاصيل كلها في الفيديو) .. بعدها طلعت الدرج العظيم و استمتعت جدا بأني بشوف الاثار بتتعرض بطريقه تليق بيها ..
لو حد سألني ايه اكتر أله فرعوني بحبه حقول (أنوبيس) ! أنوبيس مسؤول عن إرشاد الأرواح في رحلتها إلى العالم الآخر ووزن قلوب الموتى في قاعة الحساب لتحديد مصيرهم الأبدي، ورمز لعملية التجديد والحياة الجديدة بعد الموت. وهو كمان حارس مقابر الموتي من اللصوص و السرقه ! مش عارفه بحبه ليه بس بحس انه بيعمل دور مهم جدا للموتي في رحلتهم للعالم الاخر زي ما يكون مرشد ليهم في رحله كلها غموض و عدم معرفه ايه اللي بيحصل بعد الموت !
.webp)
عملت جولتي جوه المتحف و نصيحه مني ليكوا روحوا بدري ! انا خدت وقت طويل قوي عشان استمتع بالمتحف و كان لسه ما اتفتحش بالكامل! مش قادره اتخيل بعد ما فتحوا كل القاعات قاعات الملك توت عنخ آمون، قاعات العرض الرئيسية، البهو العظيم، الدرج العظيم، متحف مراكب خوفو، المنطقة التجارية، والحدائق الخارجية، اكيد حتاخد وقت طويل قوي عشان تزور كل حاجه في المتحف ! ومش بس كدا كمان هناك في مطاعم و كفايهات جوه المتحف و اماكن تجيب منها هدايا تذكاريه بس طبعاً الاسعار غاليه جدا فا حقول ليكوا بعدين انسب الاماكن اللي تجيب منها هدايا تذكاريه بسعر ارخص ! بس لو حبيت تشتري بالسعر الغالي مافيش مشاكل .. الحقيقه زيارتي هناك كانت ممتعه جداااا فوق ما تتخيلوا و اللي اخرني اني اروح ازور المتحف بعد ما اتفتح بالكامل هو كميه الزحام اللي كانت عليه بعد ما فتحوه رسمياً القاعات اللي بتعرض جميع مقتنيات توت عنخ امون ! ان شاءالله اما ازوره تاني حقولكوا التجربه بس من منظور جديد ! اتمني تروحوا تزوروا المتحف المصري الكبير اللي بقي اكبر متحف بيضم قطع اثريه في العالم !
