أوبر & ديدي: تنقل بأمان في شوارع القاهرة والأسكندرية!

لو أنت كسائح عاوز تتنقل في القاهرة بسهولة وخايف تستخدم المواصلات العامة عشان لسه مش واخد عليها .. فا من أفضل أبليكيشنز التوصيل في القاهرة همه (أوبر وديدي).

أوبر وديدي أبليكيشنز تأجير عربية (زي التاكسي) بتطلب العربية من علي الابليكيشن وتحدد المكان اللي أنت عاوز تروحله. ميزة الابليكيشنز دي بجانب أنها بنسبة كبيرة أمنه هو أنك بتبقي عارف حتدفع كام مسبقاً !

حتي لو حصل حاجه سلبية من جانب السائق (أي تصرف غير لائق أو طول في السكة عشان ياخد فلوس أكتر إلخ) بكل بساطه تقدر تديله تقييم سلبي وكمان تعمل فيه شكوي من جوه الابليكيشن.

بالرغم أنه موضوع بسيط وبديهي بس وسيلة تنقل زي أوبر وديدي سهلت عليا أنا شخصياً مشاوير كتير جداً حتي لو بدفع فلوس زيادة عن المواصلات العامة! وكمان جوه الابليكيشنز في أوتوبيسات و شاتل باص ليها أماكن ركوب معينه بس بتبقي أوفر من العربية البرايفت تقدر تحجز فيها كرسي مسبقاً وبتوصلك لأقرب مكان لمشوارك. فيه أبليكيشنز تانية زي ( أن درايف/كريم) ..

للأسف الابليكيشنز دي منتشرة فقط في مدينة القاهرة والاسكندرية.. أما في مدن سياحية تانيه زي الأقصر , أسوان مش حتقدر تستخدمها.

أعتقد أبليكيشنز زي دي حتسهل كتير علي اليابانيين التنقل في القاهرة فا بنصحهم بشدة أنهم أول ما ينزلوا مصر يعملوا داونلود للابليكيشنز دي.

ولو الموضوع ده عجبك، اقرأ كمان: من هدوء اليابان إلى صخب القاهرة… تجربة المترو من عالم مختلف! وبساطة الأكل المصري… من إسم الأكله تعرف مكوناتها!