أتكلمنا في المقالات اللي قبل كدا عن شهر رمضان بالتفصيل وكمان ذكرنا بعض العادات اللي بتظهر بالذات في شهر رمضان زي وجبه (السحور) واللي قلنا أنها أخر وجبة بتتاكل إستعداداً لصيام اليوم اللي بعدة .. بس في المقالة دي حنتكلم عن مظهر من مظاهر شهر رمضان المميزة واللي مش حتشوفها غير في الشهر ده وهو (المسحراتي).

المسحراتي هو شخص حتلاقية ماشي قبل صلاة الفجر بساعتين أو 3 ساعات ماسك طبله وبيطبل عليها وبيقول : (أصحي يانايم.. وحد الدايم رمضان كريم).

الشخص ده وظيفته يصحي الناس قبل أذان الفجر عشان ياكلوا وجبه السحور استعداداً لصيام اليوم اللي بعدة. (إتكلمنا عليها في المقالة اللي فاتت ولو ماقريتهاش تقدر تزور اللينك ده وتقراها:

السحور : (https://egyptopia.net/article/Sohor)

والمسحراتي ده من أبرز المظاهر التراثية اللي إرتبطت في عقل الشعوب العربية و الأسلامية في شهر رمضان.

بداية شغلانه (المسحراتي) بترجع إلي عهد النبي (محمدﷺ) وكان فيه صحابي إسمة (بلال بن رباح) وهو أول من قام بمهمة إيقاظ الناس للسحور. ساعتها طبعاً أسم الشغلانة دي ماكنش (مسحراتي) عشان دي كلمة تعتبر مستجدة علي عصر النبي.. وتقريباً ماكنش ليها إسم ساعتها.

أول (مسحراتي) رسمي كان في العصر العباسي وإسمه (عنبسة بن إسحاق) وهو أول من إمتهن (التسحير) بشكل فعلي سنه 238 هجرياً.

وزي ماهو واضح إسم المهنة (المسحراتي) جايه من كلمة (السحور).

المسحراتي له شكل مميز بيبقي لابس جلابية ومعاه طبله وبيطبل بإيقاع واحد وبيقول: إصحي يانايم .. وحد الدايم رمضان كريم. (المسحراتي) مش موجود بس في مصر بس برضه موجود في دول عربية تانية بس ممكن العبارة اللي بيرددها عشان يصحي بيها الناس بتختلف عن مصر.

وطبعاً مع تطور التكنولوجيا والمنبهات والموبايلات المهنه دي إبتدت تختفي تدريجياً بس حتلاقي (المسحراتي) متواجد في الأحياء الشعبية وبعض المناطق كجزء من الفلكلور الرمضاني الأصيل.

شهر رمضان مش بيكتمل الا بوجود المسحراتي عشان كلنا كمصريين إرتبطنا بوجوده وبصوت طبلته في شهر رمضان. حتسألني طب أقدم فين عشان أشتغل مسحراتي ! ههههههههه مافيش مكان بتقدم فيه أنزل بالجلابيه والطبله وخلاص كدا أنت أتوظفت ! ده بيبقي عمل تطوعي من بعض الناس في المناطق وفيه بعض الناس بيدوهم فلوس كنوع من أنواع الشكر علي مجهودهم بس ماحدش ملزم يديهم فلوس ! قبل إنتهاء رمضان بعض الناس بيدوا المسحراتي هدية أو حلويات كنوع من أنواع الشكر علي مجهودة طول شهر رمضان فا أنه يصحيهم عشان يتسحروا!

ها ياجماعه عاوزين تبقي مسحراتية؟