من هدوء اليابان إلى صخب القاهرة… تجربة المترو من عالم مختلف!

مترو الأنفاق في مصر مش مجرد وسيلة مواصلات…ده عالم كامل بيعكس تفاصيل الحياة اليومية للمصريين.من الزحمة، للأصوات، للحوارات اللي بتحصل من غير ترتيب، المترو بيحكي قصة مدينة ما بتنامش. ورغم إن المترو وسيلة مواصلات مشتركة في دول كتير،

إلا إن التجربة بتختلف تمامًا من بلد للتاني. والمترو في مصر مثال واضح على إزاي نفس الفكرة ممكن تعكس ثقافة مختلفة تمامًا.

المترو في مصر واليابان وسيلة مواصلات أساسية وزي مافيه إختلافات.. فيه كمان حاجات مشتركة بينا وبين بعض.

شبكة المترو في مصر مش معقدة زي اليابان .. في اليابان شبكات المترو كتيرة وبتوصلك لكل حته .. بس في المترو في القاهرة إستخدامة أبسط بكتير مقارنة باليابان.

المترو في القاهرة الكبري مكون من 3 خطوط رئيسية (الخط الأول: حلوان-المرج، الخط الثاني: شبرا-المنيب، الخط الثالث: عدلي منصور-جامعة القاهرة/روض الفرج) وحالياً شغالين علي الخط الرابع.

وعشان الخطوط في المترو مش كتيرة فا أعتقد إستخدامه أبسط بكتير من اللي في اليابان خصوصاً لحد زيي (بتوه لحد دلوقتي في الحته اللي أنا ساكنه فيها! ).

محطات المترو بتعرفها بالعلامه المميزه دي:

من سنتين كانت تذاكر المترو سعرها موحد لكل المحطات ولكن بعد كدا بقي سعر التذكرة حسب عدد المحطات... تذاكر مترو القاهرة تبدأ من 8 جنيهات وتصل إلى 20 جنية حسب عدد المحطات (حتى 9 محطات بـ 8 جنيهات، 10-16 بـ 10 جنيهات، 17-23 بـ 15 جنيهًا، وأكثر من 23 محطة بـ 20 جنيهًا).

·شراء التذاكر:

بتشوف أنت حتركب من محطه ايه لفين ويا بتشتري التذكرة من شباك التذاكر.. أو حالياً بقي متوفر مكنه شراء التذاكر تقدر تحدد المحطه اللي انت عاوزها وتشتري التذكرة بكل سهولة (زي ما موضح في الفيديو). المكن بيبقي فيه لغه عربية وإنجليزية فقط. أتمني مستقبلاً ينزلوا مكن يبقي فيه كذا لغة عشان يسهل للأجانب إستخدامة.

بيبقي فيه محطات عشان توصلها لازم تحول من الخط (محطات تبادلية) زي مثلاً (محطه الشهداء – جمال عبدالناصر-العتبه). فا خد بالك وتركز وأنت بتحدد المحطة اللي عاوز تنزل فيها.

جوه المترو بيقولوا أسامي المحطات باللغه العربية والانجليزية فا الموضوع بيبقي سهل أنك تعرف أنت في أنهي محطه.

الحاجات اللي إحنا شبه المترو فيها في اليابان هي وجود عربات مترو مخصصه للسيدات .. بيبقوا عربيتن في النص واحده فيهم بتبقي للسيدات طول اليوم والتانية بتبقي للسيدات لحد الساعه 9 بليل بعدها مسموح للرجالة إنهم يركبوا فيها بعد الساعه 9 بليل. لو راجل دخل عربية السيدات في الأوقات الصباحية بياخد مخالفه وبيتطرد منها.

علي عكس المترو في اليابان, المترو في مصر صاخب حتي جوه العربيات.. في اليابان بتبقي الناس في المترو هادية جداً وماحدش بيتكلم خالص وأي حد بيتكلم بصوت عالي بيتبصله بصه حادة .. حتي صوت الموبايل بيتقفل ولو جاتلك مكالمه مش بتعملها الا أما تنزل من المترو ومش بس كدا ممنوع الأكل والشرب كمان داخل عربيات المترو.. بس الوضع في مترو القاهرة عكس ده تماماً! في المترو في القاهرة الناس بتتكلم عادي جداً وممكن تبقي متابع حوار الناس وهي بتتكلم وحتلاقي ناس بتاكل وبتشرب .. ومش بس كدا ممكن أما المترو بيكون زحمه تلاقي الناس قاعدة علي الارض ! الحقيقة أنا كمصرية ماعنديش مشكله في أن الناس تتكلم في المترو بس يكون بصوت واطي وأكتر حاجه مش بطيقها أما حد ياكل حاجه جوه عربيه المترو وريحتها نفاذة ! مع كتمه النفس في المترو ببقي عاوزه أوصل المحطه بتاعتي بسرعة!

برضه قعده الناس علي الارض بتبقي معيقه ليا أما بنزل من عربيه المترو وكتير قوي ببقي حتكفي وأقع علي وشي منهم! كله كوم وأكتر حاجه بتقلقني أما يبقي طفل معاة حاجه يشربها وبخاف يوقعها عليا.. بجري منه وأقف في حته تانيه علي طول!

أغرب حاجه ممكن تلاقوها بقي أن فيه ناس بتخش العربيات (بالذات في خط حلوان -المرج) و بيبيعوا حاجات ! زي اكسسوارات أو مكياج وكدا ! طبعاً همه بيخشوا بطرق غير شرعية بس الأمن بيتصرف معاهم. برغم إني مش حابه وجود بياعين جوه عربيات المترو الا إني مره أشتريت حلق وإكسسوارات منهم.

بغض النظر عن السلبيات اللي فوق دي ألا أن المترو في القاهرة وسيلة مواصلات أمنه جداً ونضيفة! سمعت كتير من أصدقائي اللي سافروا برا أن المترو في القاهرة أنضف وأكثر أمان من المترو في فرنسا أو أمريكا! و الموضوع ده بسطني جداً.

وطبعاً أحب أطمن اليابانيين أن المترو في القاهرة مواعيدة مظبوطة فا ما تقلقوش!

أما كنت بدرس في جامعة القاهرة سنه 2005 كنت دايماً بستخدم المترو وأنا رايحه.. زمان قبل ما أتجوز كنت عايشة في وسط البلد ومحطة المترو كانت تحت بيتي بالظبط.. كنت بروح الجامعة مثلاً في نص ساعه بكون هناك وكانت التذكرة ساعتها بسعر موحد لكل المحطات ب75 قرشاً !

بس دلوقتي المترو أتطور وبقي فيه مكن لشراء التذاكر بكل سهولة .. أما أتعمل المكن ده ماصدقتش لاني مش بحب أقف في طابور شباك المترو وكمان مش بحب أتعامل مع بشر كتير.

تجربة مترو القاهرة ممكن يكون فيها بعض السلبيات مقارنه باليابان.. ممكن يكون صوتنا العالي في المترو مزعج مع عدم موجود نظام أما الناس بتخش وتطلع من عربيات المترو.. بس بحسها تجربه عشوائيه فريدة من نوعها .. ممكن لو حد ياباني علي طول أتخنق بسبب القوانين الصارمه في اليابان يجي عندنا ويبقي ريلاكس شويه! 

في الآخر، المترو مش مجرد وسيلة مواصلات…هو مراية للناس، للصوت، ولطريقة المعيشة.

نفس القطار، بس روح مختلفة في كل بلد.

ولو الموضوع ده عجبك، اقرأ كمان: أوبر & ديدي: تنقل بأمان في شوارع القاهرة والأسكندرية! ومونوريل القاهرة: خطوة جديدة نحو مستقبل المواصلات في مصر!