شوكولاتة مصرية بتصميم فرعوني هديّة تذكارية مختلفة من مصر!
شوكولاتة مصرية بتجمع بين الطعم الحلو والهوية المصرية الأصيلة، بتصميم فرعوني مستوحى من حضارة عمرها آلاف السنين. هدية تذكارية مختلفة، خفيفة وسهلة تتاخد في السفر، وتقول “دي من مصر” من أول نظرة.
أنا كمصرية بعشق أي حاجه عليها تصميمات فرعونية! أول ما بشوفها بتاخد عيني وببقي عاوزه أشتريها! ومن ضمن الحاجات اللي لاقيتها و
صناعة مصرية 100% هي الشوكولاتة دي ! شدني تصميم الأغلفه بتاعتها جداً لدرجه أني اشتريت كل المجموعة ! لاقيت تصميمات للأله أنبويس, و توت عنخ أمون ومومياء, ومش بس الديزاين من برا بس كمان تغليف الشوكولاته من جوه برضه عاملين عليه كتابه هيروغليفي باللون الدهبي والأسود المميز.
طبعاً انا قلقت يكون طعمها مش حلو ولكن ! أما دقتها عجبتني جداً جداً كان فيه بجوز الهند والبندق واللوز ! و كان فيه منها الدارك بس ماجبتهاش.
الشوكولاتة دي ممكن تكون هدية تذكارية جميلة جداً من مصر خصوصاً إنك بعد ما تاكل الشوكولاتة حتقدر تحتفظ بالعلبه بتاعتها! و ده اللي انا عملته!
كمان أسم الشوكولاتة مميز جداً (تويا) كانت ملكة مصرية قديمة عاشت خلال الأسرة التاسعة عشرة وتم العثور على مقبرتها هي وزوجها (يويا) في وادي الملوك سنه 1905 وهي شغلت مناصب رفيعة في التسلسل الإداري والديني.
الشوكولاتة سعرها مش غالي .. وقت كتابه المقاله دي يوم 29 يناير 2026 كانت ب 40 جنية! و بكدا أكون بوثق أسعار الحاجه عشان الزمن حيعدي والاسعار أكيد حتتغير!
ايه رايكوا تحبوا تاخدوا حاجه زي دي لأصدقائكوا في اليابان؟ وإيه التصميمات اللي نفسكوا تلاقوها وتكون متعلقه بالحضارة المصرية؟ انا كان نفسي ألاقي الأله حورس مثلا!
ولو الموضوع ده عجبك، اقرأ كمان: أكل الشارع المصري: البطاطا المشوية! والكشك في مصر : لو خدت لبان بدل الباقي … ما تقلقش!
