أكل الشارع المصري: البطاطا المشوية!

الأختلافات بين الشعوب كتيرة قوي .. بس دايماً اللي بيجمعنا الأكل .. والبطاطا المشوية في مصر من السناكس الصحية الأساسية في الشارع المصري في الشتا! في اليابان برضه بياكلوا البطاطا المشوية كسناك في إكشاك أسمها بالياباني (焼き芋屋台yaki imo yatai) .

إحنا كمان عندنا نفسي الأكشاك دي بس بتبقي عربيات خشب زي اللي بيتباع عليها الدرة المشوية اللي إتكلمنا عليها قبل كدا .. و بيبقي عليها زي فرن أو شواية صغيرة و بيشوي فيها البطاطا..

طول ما أنت ماشي في شوارع مصر حتلاقي من العربيات دي منتشرة جداً في الشوارع في الشتا.. وتقدر طبعاً تعمل البطاطا المشوية في الفرن في البيت .. بس أما بتشتريها من العربيات بتاعت البطاطا بيبقي طعم الشوي علي الفحم حاجه تانية خالص !

العادي أنك تاكلها بدون إضافات بس مؤخراً بقي يتحط عليها إضافات زي الشوكولاتة والمكسرات والعسل والقرفه.. عندك إختيارات كتير بيخليها وجبة مسكرة جميلة جداً.. أنا شخصياُ بحب أحط عليها عسل وقرفه!

كمان في مصر عندنا أكله حلوة مشهورة جداً أسمها (بطاطا بالبشاميل).. بتبقي عبارة عن البطاطا مسلوقة ومهروسه وعليها صوص البشاميل بس مش بيبقي حادق بيبقي مسكر وبتتحط في الفرن تاخد لون دهبي كدا وبتتاكل دافيه بتبقي حلوة جداً!

هل فيه فرق بين طعم البطاطا في مصر واليابان؟ البطاطا عندنا فيه منها نوعين .. نوع بيبقي لونه برتقالي فاتح قوي و التاني بيبقي برتقالي غامق.. انا بحب النوع التاني عشان بحسه مسكر أكتر. لو جربتوا البطاطا بتاعتنا في مصر ياريت تقولولي هل في أي فرق في الطعم بينها وبين اللي في اليابان ولا لأ!

ولو الموضوع ده عجبك، اقرأ كمان: الكشك في مصر : لو خدت لبان بدل الباقي … ما تقلقش! وإيجيكون: إيفينت بيجمع محبي اليابان! يلا ندخل عالم الأنيمي والكوسبلاي!