سناك الشارع المصري: الدرة المشوية الصحية !

حساك كياباني حتستغرب ايه ده أخيراً أكل مصري صحي؟ مش معقولة!

الدرة المشوية (أو كوز الدرة) من أكترالسناكس الصحية إنتشاراً في الشارع المصري! زمان وأنا طفلة كان والدي ينزل بيا ويروح جايبلي كوز درة مشوية من علي العربية في الشارع.

عادة الدرة المشوية بتتباع علي عربيات خشب بتبقي منتشرة في الشوارع الجانبية أو علي كورنيش النيل وقرب محطات المترو.. السناك ده بنعتبرة تصبيرة سريعة ورخيصه (بيبقي تمن الكوز الواحد من 10 ل 20 جنية) بتتشوي علي الفحم فا بتدي الدرة طعم مميز جداً.

الدرة المشوية اللي بتتباع علي العربيات بقيت جزء لا تجزأ من فلكلور الشارع المصري.. و بتعتبر من الأكلات الصيفية المميزة هنا في الشوارع.

بقي في إتجاهات كاتشي أكتر زي (السويت كورن) اللي بيتباع في كوبايات وبيبقي عليه توابل متنوعه وأي إضافات زي الجبن وإنتشر مؤخراً عشان يناسب المراهقين والشباب والجيل الجديد.

مش قلتلكوا في كذا مقاله قبل كدا أن الاكل بيتطور بتطور المجتمع والزمن؟ بس المصري الأصيل مش بسهولة يقدر يستغني عن طعم الدرة المشوي الخطير!

ولو الموضوع ده عجبك، اقرأ كمان: بساطة الأكل المصري… من إسم الأكله تعرف مكوناتها! ومصر VS اليابان: إختلافات ولا صدمة ثقافية؟