وجبة السحور: سر تحمل الصيام!

في المقال السابق أتكلمنا عن شهر رمضان وأجواء شهر رمضان المميزة في مصر .. تعالوا مع بعض نشوف بعض الحاجات اللي بتتعمل في شهر رمضان بس ومن الحاجات دي وجبه (السحور).

زي ما قلنا قبل كدا أن الصيام في رمضان بيبتدي من الفجر (شروق الشمس) لحد أذان المغرب (غروب الشمس) وبعدها بناكل وجبه (الأفطار).

المقالة بخصوص رمضان :

https://egyptopia.net/article/Ramadan

وأخر وجبه بناكلها إستعداداً لليوم التاني من الصيام هي وجبه أسمها ( السحور). وجبة السحور بتكون قبل شروق الشمس (الفجر/ قبل صلاة الفجر) فيه ناس بتحب تاكلها قبلها بساعه و فيه ناس بتحب تاكل قبلها بساعتين بس بمجرد ما أذان الفجر بيأذن بيبقي ممنوع تاكل أو تشرب أو تدخن خلاص.

طب وجبة السحور دي بتبقي عبارة عن إيه؟

والله يفضل تكون وجبة مش دسمه زي ما الناس متخيلة ويفضل تكون وجبة مغذية وبطيئة الهضم ومايبقاش فيها أملاح كتير عشان ما تعطش بسرعة.

غالبية المصريين بيحبوا ياكلوا في وجبة السحور فول بالعيش وبيض وزبادي وسلطة.. وفيه ناس بتحب تاكل ساندوتشات فيها جبنة وبيض وحاجه حلوة زي مثلا زبادي بالفاكهه أو لبن بالتمر.

مافيش وجبه ثابته طبعاً للسحور بس الشائع أن يكون الفول موجود في الوجبة دي.

أنا شخصياً بحب أكل في السحور فول وبيض مع العيش ولو حاكل حاجه حلوة حيكون زبادي بالشوفان والفاكهه.

في رمضان بيبقي فيه محلات كتير في الشارع المصري بتقدم وجبات سحور للناس اللي بتحب تاكل برا وتسهر وكتجربة جميله جداً لو حتخرج مع العيله لوقت متأخر وحابب تشوف أجواء السحور في الشارع المصري.

المقال اللي جي حنغطي جوانب تانيه من شهر رمضان في مصر !

ولو الموضوع ده عجبك، اقرأ كمان: موائد الرحمن: الأستمتاع بالإفطار في الشارع المصري! وشم النسيم في مصر من أيام المصريين القدماء = فسيخ ورنجه وبيض ملون!