الموضوع بتاع المقالة ده ممكن يجيب أزمه قلبيه لحد ياباني .. بس حقول إيه! أهو إختلاف ثقافات وزي ما تقولوا أتعودنا علي الموضوع ده .. هل تعلم عزيزي الساموراي أنه في مصر أما بتروح تشتري حاجه من الكشك أو عندكوا في اليابان (الكومبيني) و بالمناسبة ده شكله في مصر كدا حتلاقية في كل كورنر في مصر بيبقي كدا صغير ومحندق بس نينجا وفيه كل حاجه.. المهم .. أما بتروح تشتري أي حاجه من الكشك ده وكان باقي ليك باقي مثلا 2 أو3 جنيه وهو مش معاه فكة يرجعلك الباقي فا بيروح مديك لبان أو بون بون أو باكو بسكوت بالباقي ده؟

لا تقلق عزيزي الياباني .. هو مش بينصب عليك ولا حاجه بس ده جزء من ثقافة الشارع المصري من زمان قوي .. لو ليك باقي فكه من 2 ل 3 جنيه وهو مش معاه فكه يرجعلك الباقي ده فا مش معقوله حيمشيك كدا وفلوسك ناقصه فا بيروح يديك بيهم لبان أو بسكوت .. وزمان قوي بقي كان بيديك دوا للصداع أسمه (ريفو) .. يعني مقام شريط كدا مثلاً .. والله مش بهزر!

العادة دي مش غريبة علينا كمصريين خالص بل ساعات أنا اللي بطلب بالباقي أي حاجه من عنده بسكوت أو لبان وخلاص ده بقي جزء من هوية الشارع المصري.. فا لو جيت مصر ولاقيت الراجل في الكشك بيناولك بسكوت خده وأنت ساكت كدا حتي لو مش عاوز الحاجه دي خدها وخلاص وأنا بقولك هو مش بينصب عليك!