بمناسبة قرب قدوم فصل الصيف فا حنتكلم عن الفواكه المميزة لفصل الصيف في مصر .. أول فاكهه حنتكلم عليها في المقالة النهرده اللي مافيش حد مش بيحبها هي فاكهه (المانجو) أو زي ما بننطقها في مصر (المانجا). لا مش المانجا بتاعتكوا في اليابان ! أحنا بنقولها مانجا مش مانجو !

بمجرد ما تلاقي صناديق المانجا مترصصه عند بياع الفاكهه تعرف أن خلاص كدا فصل الصيف جه. أنواع المانجا اللي بتتزرع في مصر كتير جداً وكل نوع له أسم مميز عشان كل نوع مانجا مختلف في الطعم والخصائص وعلي حسب زوق كل واحد بيبقي عندك نوع مفضل من المانجا بتحب تاكله. وحتستغرب أكتر اما تعرف أسامي أنواع المانجا عندنا في مصر عشان فيه أسامي منها أسامي رجاله وأسامي مانجا علي أسامي ستات كمان! الموضوع مضحك جداً بالنسبه لي وبصراحه مش عارفه مين اللي إختار أسامي المانجا بالشكل ده.

عموماً المانجا في مصر جودتها عالية جداً جداً وعلي عكس اليابان فا الفاكهه عندنا مش بتتباع بالواحده بس هنا عاده سواء خضار أو فاكهه بنجيب بالكيلو أو بالصندوق علي حسب أستهلاك كل شخص و الفواكه عندنا مقارنه بالدول الاوروبية واليابان تعتبر رخيصه جداً. في مصر فيه أكتر من 100 نوع مانجا وكل نوع له طعم وشكل ولون وخصائص مختلفه وعشان همه أنواع كتيرة قوي تعالوا نشوف أشهر الأنواع المنتشرة في مصر ونشوف خصائص كل واحده فيهم وعلي أساسها تقدر تختار أني طعم حيكون مفضل ليك في الأكل:

من أشهر أنواع المانجا في مصر المانجا (العويس) و (عويس) ده أسم راجل ! بتعتبر المانجا العويس من أشهر وأفضل أنواع المانجا في مصر بتتميز بالحجم المتوسط وقشرتها سميكة ولون القشرة بيميل للأخضر الفاتح أو الأصفر حسب درجه نضجها. لحمها طري ومليانه عصارة وتقريباً خاليه من الألياف (اللي هو الشعر اللي بيبقي علي البذرة من جوه).

تعتبر أفضل نوع مانجا مصرية عشان طعمها حلو ومُركز وريحتها قويه جداً.. تقريباً كل المصريين بيحبوا النوع ده.

وبرضه نفس شجرة مانجا العويس بتطلع نوع مانجا أسمه (فص عويس) وهي نفس نوع بس بتكون المانجا مش مكتمله النمو فا بيفضل شكلها صغير وعشان كدا أتسمت (فص) دلاله علي صغر حجمها وده اللي بيخلي تركيز السكر فيها عالي وطعمها حلو وهي بتبقي أغلي سعراً مقارنه بأنواع تانيه.

تاني نوع مانجا (الزبدية) والزبدية هنا بمعني (Butter) بيبقي قوامها ناعم ودسم وعشان كدا أتسمت (زبدية) قشرتها سُمكها متوسط وسهله التقشير وفيها نسبه ألياف متوسطة ومناسبه جداً تعمل منها عصائر ومشروبات. طعمها حلو بس مزز شويه.

تالت نوع وبرضه منتشر جداً والمصريين بيحبوة جداً هو المانجا (السُكري) والسًكري هنا جايه من (السكر) عشان طعمها مسكر جداً قشرتها رقيقه ولونها بيكون أصفر فاقع وحجم بذرتها صغير.

رابع نوع ودي اللي أنا بعشقه جداً بصراحه وهي المانجا (النعومي) ونعومي ده أسم بنت.. المانجا دي لونها مميز جداً بيبقي أحمر و داخل فيه لون أصفر أو أخضر وقشرتها متوسطه السُمك وحجمها متوسط طعمها حلو جداً ومش مززة ومافيهاش ألياف أو الشعر اللي بيكون علي البذرة. وده أكتر نوع بيبقي برضه مطلوب محلياً وللتصدير كمان.

وخامس نوع قريب من المانجا (النعومي) وهي المانجا (هايدي) وهايدي برضه أسم بنت ! برضه النوع ده له نفس خصائص المانجا النعومي بس ممكن شكل المانجا بيكون دائري شويه مش الشكل البيضاوي بتاع المانجا المتعارف عليه.

وبرضه فيه أنواع مانجا تانيه خصائصها قريبه من اللي قلناهم فوق زي مانجا (فونس) و(تيمور) و تيمور ده برضه أسم راجل 😊 ومش حقدر أجمع كل أسامي المانجا بس أشهرهم اللي قلتهم فوق.

برضه علي سيرة المانجا .. حتلاقي محلات العصاير في الشارع المصري بتعمل عصير مانجو فريش رهييييييب لازم بجد تجربوا تشربوا عصير المانجا من المحلات اللي في الشارع بتبقي ساقعه ومسكرة بدون أي أضافات!

وبرضه من أشهر الحلويات اللي بتنتشر في شهر رمضان وبتتعمل برضه مع المانجا هي (الكنافه بالمانجا) !

عاوزاكوا بقي يا يابانيين أما تيجيوا مصر تجربوا كل أنواع المانجا وتشوفوا أكتر نوع حبيتوه! خصوصاً أن سعرها في مصر رخيص وتقدروا تجربوا أنواع كتير جداً !

المقالة اللي جايه حنتكلم عن فواكه تانيه بتطلع في فصل الصيف في مصر !