من صلاة العيد لحد الكحك… تعالوا نشوف أجواء العيد في مصر!

بما أن رمضان خلص فا ياتري بعد شهر رمضان مابيخلص بنعمل ايه؟

في المقالة بتاعت النهردة حنتكلم عن ما بعد رمضان! أول حاجه أخر يوم في رمضان بنقول عليه (الوقفه) اللي هو بمعني (أيقاف الصيام/ أو أخر يوم في رمضان وسيتوقف الصيام) بعدها بيبقي فيه (عيد الفطر المبارك)!

الأحتفالية اللي بعد رمضان بنقول عليها (عيد الفطر أوالعيد الصغير) عشان أجازتها قصيرة بتبقي 3 أيام وكمان عشان نفرق بينها وبين أجازة (عيد الأضحي أو العيد الكبير) اللي بتبقي بعد موسم الحج. أول حاجه بتتعمل في عيد الفطر هو أن الصبح أول يوم عيد الناس بتنزل تصلي صلاة (العيد) في المسجد وبتبقي صلاة مختلفه عن الصلوات العادية اليومية.. الصلاة دي بتبقي بعد شروق الشمس ب20 دقيقة تقريباً.

تعالوا بقي نشوف مع بعض الاول بنعمل ايه بالترتيب لتجهيزات العيد:

·      قبل العيد بنعمل حاجات قريبة من عادات اليابانيين في راس السنه بتاعتهم اللي هي الお正月 (أوشوجاتسو) زي أننا بنضف البيت تنضيفه العيد وبننزل نجيب هدوم العيد (بتبقي هدوم جديدة عشان نحتفل بالعيد).

أول يوم عيد بعد إنتهاء الصلاة بنرجع البيت ونفطر وهنا الناس بتفطر علي أشهر حاجه معروفه في العيد عندنا وهو الكحك (بسكوت معمول من الدقيق والسمنه والزبده وبيترش عليه سكر) والكلام عن الكحك المصري طويل جداً فا حنتكلم عليه في المقاله دي علي خفيف يعني زي مكوناته وأشكال البسكوت اللي بيتاكل في العيد أما المعلومات التفصيليه حتكون في مقاله منفصله في قسم (الأكل المصري التقليدي) أو فيه ناس بحب تفطر الفطير المشلتت (نوع فطير مصري معمول من الدقيق والسمنة مشهور في مصر جداً).

المهم أن الفطار في العيد بيكون حاجات مش محتاجه مجهود في الطبيخ عشان الناس بتبقي خارجه من رمضان مرهقه من الطبيخ كل يوم.

·   مظاهر الأحتفال في العيد بتبقي هي أننا نشتري هدوم جديدة (قبل العيد طبعاً) وعادة أول يوم عيد الناس بتختلف في تقضيتة .. فيه ناس بتحب تسافر برا القاهرة عشان تغير جو خصوصا لو الأجازة طويله وداخل فيها أجازه أخر الاسبوع (زي ماهو حصل السنه دي الاجازه من يوم الخميس لحد يوم الاتنين). أو فيه ناس بتحب تروح تزور قرايبها وأهلها ويتجمعوا في بيت حد والتجمعات العائلية دي بتبقي أحلي حاجه في العيد حيث أن فيه ناس مش بتشوف بعض كتير فا أما بيتجمعوا في العيد يتبادلوا أخبارهم وياكلوا الكحك والبسكوت مع بعض.

بعض الناس بتحب تخرج في الجناين والمتنزهات ... بس بصراحه بتبقي زحمه جداً فا أنا عاده بروح أزور أهلي أو قرايبي.

برضه أحنا في العيد بنعمل زي اليابانيين في راس السنه (الأوشوجاتسو) أننا بندي العيدية! والعيدية في اللغه اليابانية إسمها ( أوتوشي داما お年玉) إحنا برضه بنعمل كدا الشخص الأكبر سناً بيدي الشخص الأصغر سناً عيدية ! أنا لحد دلوقتي وأنا عمري 37 سنه لو فيه حد أكبر مني بيديني عيدية برضه 😊 ! (بصراحه بنبسط زي العيال الصغيرة بيها برضه).

دلوقتي بقي حنتكلم عن أخر وأجمل حاجه في العيد وهو (الكحك)!

الكحك بأختصار تقليد مصري أصيل بيرجع ل 5000 سنة في مصر القديمة ومنقوش علي جدران المعابد (زي مقبرة رخ مي رع بالأقصر) وكان بيتقدم كقرابين للآلهة أو في المناسبات الجنائزية. كان بيتشكل الكحك علي شكل مستدير زي قرص الشمس (للألة رع) وبينقشوه بزخارف فنية وكان بيتعمل من الدقيق والسمنة والعسل وطقوس صنعه مش بتختلف كتيرعن دلوقتي.

بدأ الكحك في مصر القديمة كطقس ديني ومع الوقت بقي جزء لا يتجزأ من موروث ثقافي وشعبي مصري في مختلف الأعياد والمناسبات وبقي رمز بيعبر عن الفرحه والأحتفال.

الكحك طريقه صنعه مش بتختلف كتير عن طريقة صنعه في مصر القديمة يعني المكونات الاساسية زي الدقيق والسمنة ما أتغيرتش بس بيتضاف عليه سمسم وسكر وخميرة ولبن أو مياة.

بعد الخبز بيترش عليه سكر بودرة! بس أنواع الكحك بقي كتيرة جداً فيه كحك سادة ( جواه مافيش حاجه) وفيه كحك بالملبن وكحك بالمكسرات (بيتقال عليه معمول).

ده غير أنواع البسكوت التانيه اللي بتتقدم برضه زي البيتيفور وبسكوت النشادر والبسكوت بالبرتقال.

طبعاً مع تطور الزمن الناس بقيت تحب تعمل إضافات زي بسكويت مغطي بالشوكولاتة.وكمان فيه نوع بسكوت اسمه (الغُريبة)! بيبقي قوامة في الاكل مختلف عن البسكوت العادي وناس كتير بتحبه.

فيه ناس لحد النهرده بتحب تعمل الكحك في البيت وتحضرة بنفسها وفيه ناس بتحب ما تتعبش نفسها و تشترية جاهز وده اللي دارج بنسبه كبيرة أنه يتجاب من المحلات علي طول! في مصر المحلات والمخابز بتتنافس في عمايل الكحك والبسكوت يعني أشهر المحلات في مصر للكحك همه (العبد) و(تسيباس) و(قويدر) وطبعاً فيه محلات تانيه كتير مشهورة زي (ساليه سوكريه) و (لابوار) والمحلات كتيرة قوي بصراحه والكل بيتنافس علي طعم الكحك وشكل العلبه والسعر!

السنه دي فيه محل إسمه (أكسبشن) نزل علبه كحك كبيرة عامله زي خزنه البنك بسعر 39000 جنية ! وده طبعاً جنااااان مافيش علب كحك بالسعر ده علب الكحك بتبقي أسعارها بتختلف حسب هل هو كحك ساده ولا جواة حشوه بس بتبقي من 150 جنيه للنص كيلو مثلا للكحك الساده وطبعاً بيختلف السعر حسب المحل اللي بتشتري منه. بس علبة كحك ب 39000 جنية (يعني حوالي 118,530 ين) غالباً بيعملوا كدا عشان يبقوا تريند والناس تتكلم عليهم في السوشال ميديا مش أكتر !

طبعاً مش محتاجه أقول أن الكحك ده قوووونبله سعرات حرارية ! ياريت ناكل بأعتدال !

في المقالة اللي جايه حنتكلم بالتفصيل أكتر عن الكحك زي ماقلت و كل سنه وأنتوا طيبين وعيد سعيد!

ولو الموضوع ده عجبك، اقرأ كمان: 🌸عيد الأم في مصر: بدأ بفكرة في جرنال!🌸 ورمضان في مصر… حاجة تانية فانوس، مدفع إفطار، ومسحراتي!