موائد الرحمن: الأستمتاع بالإفطار في الشارع المصري!

إتكلمنا في المقالات السابقه عن شهر رمضان وإيه أهم الحاجات اللي بتميز مصر في شهر رمضان عن باقي الشهور.. إتكلمنا عن المسحراتي... وجبه السحور.. المشروبات الرمضانية.. بس النهردة حنتكلم عن مظهر جميل جداً حتشوفة في شوارع مصر بس في شهر رمضان وهو (موائد الرحمن).

موائد الرحمن هي تقليد رمضاني لإطعام الصائمين من الناس الغير مقتدرة إنها تجيب أكل لاسرة كاملة أو شخص غير ميسور الحال مادياً كنوع من أنواع التكافل الأجتماعي والمساعدة من الناس. تاريخياً التقليد ده إبتدي في العصر الفاطمي وبقي مستمر لحد دلوقتي.

طول ما أنت ماشي في الشوارع حتلاقي طرابيزات طويله كدا وبيتقدم فيها الأكل والشرب للصائمين بدون مقابل يعني أي حد حرفياً ممكن يقعد ويفطر.

طيب من اللي بيتكفل بمصاريف الأكل والشرب ده؟ بيتكفل بيه مؤسسات خيرية أو رجال أعمال أو أهالي المنطقه عن طريق أشخاص بيتبرعوا بالمصاريف أو تحضير الوجبات دي وحالياً أتطور الموضوع بأن الوجبات بقيت تتعمل زي (تيك أواي).

ميزة التقليد ده أنه بيجمع الناس إنها كلها تفطر مع بعض وبتشوف فيها قد إيه الناس متعاونه جداً وبتظهر جانب جميل جداً من المصريين.

وبقيت من أشهر موائد الرحمن هي مائدة الرحمن اللي بتتعمل في مكان أسمة (المطرية) وبقي إسمه برضه زي أسم المنطقه دي (إفطار المطرية) بيتعمل يوم 15 رمضان. كان في الاول الافطار ده مكانش معروف قوي لحد ما بقي معروف من سنتين أو 3 وبقي يروحه وزراء وسفراء .. حتي السنه دي المستشارة الأعلامية لسفارة ألمانيا راحت بنفسها تعمل المحشي هناك! والفطار ده بقي بيتجمع فيه فنانين وناس مهمه جداً في مصر من السفارات والناس المشهورة وبيفطروا مع أهالي المنطقه في المطرية.

هل تحبوا تجربوا تفطروا علي موائد الرحمن أما تنزلوا مصر عشان تحسوا بجو رمضان؟ ماتخافوش كله ببلاش !

ولو الموضوع ده عجبك، اقرأ كمان: تعريف بالجواز في مصر… من الخطوبة للفرح!! ووجبة السحور: سر تحمل الصيام!