محبي الأنيمي والمانجا الياباني و الكوسبلاي كتير جداً حوالين العالم .. وفي مصر والعالم العربي كلنا كنا مرتبطين بالانيمي الياباني من وإحنا أطفال أما كنا بنتفرج علي كونان وجراندايزر وماروكو الصغيرة وبوكيمون وأنيميات كتيرة جداً علي قناة سبيس تون .. كل الانيميات دي كانت مدبلجة بالعربي.

مع أنتشار الأنترنت إبتديت أشوف الأنيمي باللغة اليابانية وكان تقريباً أول أنيمي أشوفه وأسمع ساعتها اللغة اليابانية لاول مره في حياتي كان أنيمي (ديث نوت) و (ناروتو). وكتير زيي إبتدي حبهم لليابان واللغة اليابانية من الفرجه علي الأنيمي الياباني.

مع مرور الوقت وطبعاً تطور الأنترنت واللي بيجي معاه إنفتاح كبير علي عوالم جديدة علينا كمصريين إبتدي إنتشار كل ما يتعلق بالثقافة اليابانية زي المانجا والأنيمي .. لأن كل اللي كان منتشر عن اليابان هو الفكرة التقليدية عن المجتمع الياباني (ومازلت موجوده) زي الساموراي والنينجا والجيشا بس طبيعي ما أحنا كمصريين الناس واخده عننا فكرة لحد دلوقتي أننا لسه بنروح الشغل بالجمل وعايشين في الصحرا!

حب الأنيمي والمانجا زاد وسط الشباب المصري وقت نزول أنيمي (بليتش) و( أتاك أون تايتان) و (وان بيس) ومن هنا إنتشر حب الشباب (للكوسبلاي). الكوسبلاي هو إختصار كلمة (Custom Play) وهو إنك تتقمص دور شخصية أنت بتحبها كملابس وطريقه كلام.

ومن ضمن الايفينتات اللي بقيت مشهورة جداً دلوقتي هو إيفينت (إيجي كون) اللي كان نفسي أروحه من أول ما إبتدي يتعمل في 2012 تقريباً بس كان مش مشهور خالص بس دلوقتي بقي أكبر أيفينت لمحبين أي حاجه متعلقه في اليابان :أنيمي – كوسبلاي – أكل ياباني والثقافة اليابانية في العموم .. أنا رحت الايفينت 3 مرات تقريباً وكانوا كلهم أحلي من بعض .. بحب أستمتع بعروض الكوسبلاي اللي بيبقي واضح تعب المتسابقين في تصميم الأزياء فيها وبيبقي فيه عروض لفرق يابانية بتقدم عروض رقص علي الطبل الياباني التقليدي. بيبقي فيه ستورز كتير بتبيع كل حاجه متعلقه بالانيمي والمانجا والأكل الياباني.

وكمان بيبقي فيه حفلات فيها مغنيين بيغنوا الأغاني المعروفه في الأنيمي .. بجد من أجمل الأجواء اللي حد زيي ممكن يعيشها !

الإيفينت ممتع جداً بصراحه خصوصاً أني بلاقي معظم أصدقائي اللي بيجمعنا حبنا لليابان هناك. فيه ناس فاكرة أن أجواء الايفينت مناسبه للأطفال بس ! لكن الايفينت مناسب لجميع الأعمار من الصغير للكبير عشان أكيد هناك حتلاقي حاجه تعجبك سواء كنت حد بيحب الانيمي أو عروض الكوسبلاي أو حتي جيمر ! بيبقي فيه مسابقات وجوايز وكمان بتبقي هناك في مؤسسات بتشارك في الايفينت زي مؤسسه اليابان والسفارة اليابانية!

وممكن كمان تبقي فرصه تعمل صداقات مع يابانيين لو بتتعلم اللغة اليابانية !