في المقالة دي حابة أتكلم عن شوية حاجات عادية جدًا في مصر… بس ممكن تبقى غريبة أو حتى صدمة ثقافية لليابانيين شوية 😄يلا بينا!
· أول حاجة: التدخين في الشارع في مصر:
عادي جدًا إنك تمشي في الشارع وتشرب سيجارة. طبعًا لو المكان ممنوع فيه التدخين، ساعتها لازم تلتزم. لكن غير كدا، الموضوع عادي جدًا لدرجة إن لو حد أستغرب أنك ماشي وبتشرب سجاير في الشارع فا ممكن الناس تبص له كأنها بتقول: "فيه إيه يعني ايه مشكلتك دلوقتي؟"
· تاني حاجة: المترو:
المترو في مصر أجواؤه مختلفة خالص! كنت إتكلمت عن المترو بالتفصيل في المقالة دي من هنا :
ممكن تلاقي ناس بتتكلم بصوت عالي، أو بتاكل، أو حتى قاعدة على الأرض. أي حد يشوف المنظر ده لأول مرة ممكن يحس إنه دخل حفلة مش مترو ! أنا شخصياً بنزعج من الموضوع ده بالذات الصوت العالي في المترو بصراحه بس خلاص حعمل إيه ده بقي جزء من يومي ومضطرة أتقبلة!
· تالت حاجة: إشارات المرور:
رغم إن فيه إشارات مرور في مصر، بس ناس كتير مش بتركز معاها قوي. ممكن تلاقي الناس بتعدي الشارع عادي جدًا حتى لو الإشارة حمرا.يعني ببساطة… كل واحد بيعدي الشارع بمزاجه كدا! لو في اليابان ممكن يجيله أزمه قلبية ويزعق و يقولك : إستني ما تعديش ده الاشارة حمرا! أنا هنا في مصر الحبيبة حيقولك: إشارة ايه ياااااعم صلي علي النبي دي منظر كدا!
الحياة في مصر فيها حرية وعشوائية شوية عن اليابان طبعاً … بس أعتقد ده جزء من جمالها!
ممكن تكون غريبة علي الشخص الياباني، بس في نفس الوقت ممتعة ومليانة مواقف مش متوقعة. ياترى لو حد ياباني عاش التجربة دي… هيستمتع ولا يتصدم؟
