الصيف في مصر بيوصفه حاجه واحده منعشه: البطيخ!
المقالة النهردة حتكون عن فاكهه البطيخ اللي مع أول باودر لحر الصيف بتلاقيها ظهرت في كل حته !
بس تعالوا الأول نشوف معامله اليابانيين للبطيخ في اليابان! البطيخ في اليابان بيتعامل معاملة الملوك! بيبقي في فاترينه والبطيخه زي ما تكون قاعدة علي عرش ملك !
ده غير أشكال البطيخ اللي أشتهرت بيها اليابان علي الأنترنت وأشهرهم البطيخ اللي علي شكل مربع والأغرب بقي البطيخه اللي علي شكل هرم وأسمها (بيراميدٌو سويكا) اللي معناها الحرفي فعلاً (البطيخ الهرمي) والأغرب من ده كله سعر البطيخه أصلاً ! سعر البطيخه اللي علي شكل الهرم 200 ألف ين يعني بالمصري داخله في 68 ألف جنيه! أنتوا عارفين بالمبلغ ده في مصر ممكن تشتري محل الفاكهه بصاحب المحل ذات نفسه!
تعالوا بقي شوفوا البطيخ في مصر.. أنا مصورالكوا منظر البطيخ ده كله من عند محل الخضار والفاكهه اللي جمب بيتي ! شوفوا كمية البطيخ دي تتباع بكام في اليابان؟
سعر البطيخ عندنا بيتحسب بالكيلو يعني لو البطيخه 8 كيلو بيشوف سعر الكيلو بكام ويضربه في 8 ويطلع تمن البطيخه.
أنتشر مؤخراً في مصر البطيخ بدون بذر وده اللي أنا بحبه شخصياً بيبقي أغلي شويه بس السعر مازال مقبول.
وكمان أنتشرالبطيخ الأصفر وده الحقيقه ماحبتهوش جداً حسيته بدون طعم ومستغربه لون البطيخ الأصفر بصراحه.
طعم البطيخ المصري بنسبه كبيرة حلو جداً ومسكر.. بس أحنا بقي عندنا منتشر تركيبه غريبه من الأكل وهو البطيخ مع الجبنة! أنا عمري ماحبيت الميكس ده بس المصريين كلهم بيحبوا ياكلوا البطيخ مع الجبنة ومستغربه ليه بس أتقالي أنه عشان بيبقي عامل زي السويت أند ساور البطيخ مسكر والجبنة مملحه .. غالباً بيكون نوع الجنبه فيتا أو جبنه أسمها أسطنبولي بتبقي مملحه زيادة!
وطبعاً عصير البطيخ ده عشق لا ينتهي ! كالعادة بيتباع في محلات العصير اللي حتلاقيها في كل شوارع مصر بيبقي ساقع وبدون سكر فا أهو أخيراً حاجه صحيه في الشارع المصري!
جربوا البطيخ في مصر وأبعتولي هل فيه فرق في الطعم بينه وبين البطيخ في اليابان؟ طب ولو قلتلك البطيخ الياباني ولا البطيخ المصري بعد ما تجربة حتختار إيه؟
