اليابان معروفه بالأكلات سريعه التحضير اللي بتستخدم فيها مياة سخنة وفي دقايق تكون محضر الأكل زي مثلا Instant Ramen... في مصر منتشر جداً الاندومي و فكرتها زي الرامن سريع التحضير في اليابان.. بس ماكنتش متخيلة أن من ضمن الأكل السريع التحضير الاقي الكشري!
منتج لاقيته في السوبرماركت وفكرته نفس فكرة النودلز سريعه التحضير هو تحط مياة سخنة و تستني 5 دقايق و تلاقي الأكل جاهز!
المصريين مش من طبعهم يأكلوا حاجات بتتحضر بالشكل ده أحنا شعب بيحب الطبيخ البيتي بشكل أكتر.. حتي لو بناكل أكلات سريعه بتبقي نفس الأكله اللي بتاخد وقت كبير في التحضير في البيت بس بنجيبها جاهزة من برا زي مثلا ساندوتشات الفول والطعمية.
حبيت فكرة الكشري السريع التحضير دي وحسيتها كمان تنفع تاخد منها معاك وأنت راجع لليابان عشان تدوق أصدقائك الأكل المصري التقليدي.. خصوصاً أن تحضير الكشري بياخد وقت كبير في البيت فا ساعات بيبقي أسهل ناكله من المحلات أو بشكله الجديد ده (كشري سريع التحضير)!
المنتج ده مناسب جداً لاي حد ماجربش الكشري قبل كدا وحابب يجربه بطعمه المصري.. طعم الكشري السريع تحضير قريب من الكشري اللي بيتباع في المحلات.. اديله 8 من 10. سعره حالياً وقت كتابه المقاله دي هو52 جنيه مصري (180 ين ياباني تقريباً).
ممكن تشتري منها لاصدقائك وأنت راجع من مصر عشان يجربوا حاجه مصرية ! مش حتبوظ منك وانت مسافر وتقدر تحتفظ بيها وقت طويل كمان!
.webp)
الأكل الشعبي بقي يتغير بتغير الزمن ... أعتقد منتجات زي دي بقيت تطلع عشان رتم الحياة بقي سريع.. مقارنه بزمان (مثلا 20 سنه فاتت اما كنت 17 سنه) الحياة في مصر بقي رتمها سريع ومبقاش فيه وقت الشخص يرجع يطبخ طبخه بتاخد وقت طويل .. وبنقضي معظم الوقت برا البيت فا بقي الواحد محتاج أكلات سريعه وتتحضر في وقت قليل! مش عارفه الموضوع مزعلني شويه بس تطور شكل الأكل بيعكس رتم الحياة اليومية الجديدة اللي بيتطور كمان ! كل حاجه بقيت سريعه في الزمن ده والاكل بقي من ضمن الحاجات اللي بقيت تتطورعشان تناسب رتم الحياة السريع ده !
عموماً المنتج ده تجربه لطيفة جداً وأنصح بيه كسوفونير لاصدقائك في اليابان!
