رمضان في مصر حاجه تانيه.. الجمله دي مش جاية من الفراغ.. شهر رمضان في مصر غير كل الدول الأسلامية .. مظاهر أحتفالنا وطقوسنا في الشهر ده مميزة جداُ ومش حتلاقيها في أي دولة أسلامية غير مصر! من أول فانوس رمضان لمدفع الأفطار للسحور .. جو تاني ساحر ..
أول ما يدخل شهر رمضان، مصر كلها بتغير المود. مواعيد الأكل، صوت الشوارع، والزينة في كل حتة… رمضان هنا مش بس عبادة، ده أسلوب حياة كامل.. شهر رمضان في مصر كأنك بتتقل في جو وزمن تاني وأجواء تانيه خالص .. بس قبل مانخش في مظاهر شهر رمضان في مصر حابه أدي خلفيه بسيطه عن أيه شهر رمضان ده وليه دايماً مميز في الدول الاسلامية كدا؟
شهر رمضان هو شهر الصيام في الدول الأسلامية, الصيام بيبقي من أول طلوع الفجر لحد غروب الشمس (المغرب) .. و الصيام هنا الامتناع عن الاكل والشرب وكمان التدخين لو شخص مدخن.و بينتهي الصيام وقت المغرب وبناكل وجبه إسمها (الأفطار).
رمضان بيبدأ مع رؤية الهلال، لأن الشهور في التقويم الإسلامي بتتحسب بالقمر وعشان كدا أحياناً أول يوم رمضان وكمان أخر يوم رمضان بتختلف من بلد لبلد. شهر رمضان ممكن يكون 30 يوم أو 29 يوم حسب رؤية أكتمال هلال رمضان وعشان كدا ساعات في دول رمضان بيخلص عندها يوم29 رمضان ودول تانية بيبقي 30 رمضان وكله حسب رؤية هلال شهر قمري جديد.
شهر رمضان بالنسبة لينا مش بس الأمتناع عن الأكل والشرب.. بل بيبقي شهر الهدوء النفسي و القرب من ربنا و تحسين النفس والعلاقات (علي قد ما نقدر يعني 😁).
تعالوا بقي نبتدي بأهم مظاهر رمضان في الشارع المصري و أولاً المظاهر التراثية والشعبية:
1- فانوس رمضان:
حتلاقي قبلها بأسبوعين الشوارع كلها متزينه بزينه رمضان اللي الاساسي فيها فانوس رمضان ! فانوس رمضان في مصر ده أساسي تلاقيه مع قرب شهر رمضان فيه منها أشكال كتير قوي قوي وده الشكل الكلاسيك بتاعه ومع مرور الوقت أبتدي يتغير شكله عشان يناسب الأجيال الجديدة وطلع كمان فوانيس بتغني و بأشكال وشخصيات كرتونية معروفه في مصر زي بكار وفنانيس!
حتلاقي محلات في كل الشوارع بتبيع الفوانيس دي بأشكالها وأنواعها وألونها.. حتلاقي كل الأحياء في مصر
بتزين شوارعها بالأضاءات المميزة تعبيراً لفرحتهم بقدوم الشهر ده.
حتكلم في مقالة منفصله عن أصل الفانوس ده وليه أرتبط في مصر بقدوم شهر رمضان.
2- قماش الخيامية:
زي ما موضح في الصورة القماش ده بينتشر كزينة في شهر رمضان بيتعمل منه فوانيس ومفارش للسفرة وزينه وحاجات كتير ومميز جداً كمظهر من مظاهر شهر رمضان في الشوارع والبيوت.
3- المسحراتي:
المسحراتي ده شخص بيعدي قبل أذان الفجر بساعتين عشان يصحي الناس تتسحر بيمشي في الشارع يطبل علي الطبله بطريقه مميزة وبيقول (أصحي يا نايم.. وحد الدايم.. رمضان كريم) وهو هنا بيقول للناس تصحي عشان تاكل بيبارك للناس علي شهر رمضان..المسحراتي دي مهنه قديمه جداً ومتوارثه لحد دلوقتي وبيكون في شهر رمضان بس .. فا لو جيت لمصر في رمضان وسمعت شخص بيطبل وبيقول الجمله اللي كتبتها فوق دي فا الشخص ده هو (المسحراتي) وإسم المسحراتي ده جي من كلمه (السحور) اللي هي أخر وجبه بتتاكل في اليوم إستعداداً لصيام اليوم اللي بعدة ..وبرضه حتكلم عنها بالتفصيل في مقالة منفصله.
4- مدفع الأفطار:
هو صوت ضرب المدفع وقت المغرب عشان نبدأ الفطار ونكسر الصيام..والمدفع ده له قصه طويله حبقي أكتب عنها في مقال منفصل.
· ثانياً: الطقوس الدينية والأجتماعية:
1- المساجد:
المساجد بتتزحم وقت صلاة التراويح (صلاة بتقام في شهر رمضان بعد الإفطار بساعه أو ساعتين تقريباً).
2- الإفطار الجماعي:
حتلاقي في شوارع مصر دايماً حاجه أسمها (موائد الأفطار) .. بتتعمل في الشارع علي شكل طرابيزات كبيرة وبيتقدم فيها لأكل وبيفطروا الصائمين أو الناس الغير مقتدرة علي شراء الأكل كنوع من أنواع المساعدات الأجتماعية. وممكن أي حد يقعد وياكل من غير مايدفع حاجه!
مش بس كدا ناس كتير بتحب تعمل عصائر وتوزع تمر وقت الأفطار علي الصائمين في الشارع واللي مالحقتش تروح تاكل في بيتها! بجد الحاجات دي بتأثر فيا جداً خصوصاً أنها بدون مقابل بتلاقي الناس في الشارع وقت الفطار بتوزع مياة وتمر ووجبات ببلاش .. كل واحد قادر يساهم بحاجه بيعملها.
3- شنط رمضان:
قبل شهر رمضان فيه ناس كتير مقتدرة مادياً بتشتري حاجه اسمها (شنط رمضان) للأسر الغير مقتدرة أو حالتها المادية مش كويسة .. الشنطه دي بيبقي فيها أساسيات الأكل زي (الأرز\المكرونه\زيت\بقوليات زي العدس والفول\سكرألخ) من الأكل.. بحس دي من أجمل التقاليد في مصر .. مش شرط اللي بيشتري شنطه رمضان يكون شخص غني بس الناس بتحاول تساعد بعضها باللي تقدر عليه.
·مظاهر رمضانية أخري:
- الشوارع قبل رمضان وبالذات السوبرماركتس بتلاقي عندهم أنواع من المأكولات والمشروبات المميز ظهورها في الشهر ده زي مشروب قمر الدين (مشمش مجفف) والسوبيا, والخروب والعرقسوس المأكولات بتبقي عبارة عن فواكه مجففه زي التين والقراصيا والمشمشية والتمر وكمان المكسرات بكل أنواعها.. برضه حبقي أجمعها في موضوع ومقاله خاصه جداً.
- أغاني رمضان المميزة اللي حتسمعها في التليفيزيون والراديو وطول اليوم وأنت ماشي.
- المسلسلات المصرية اللي بتبقي بعد الفطار ! مصريين كتير بيعترضوا علي أن رمضان مع مرور الزمن مابقاش شهر للعبادة وبقي شهر الفرجه علي المسلسلات .. مش عارفه أشرح ليكوا يا يابانيين أزاي بس في رمضان في مصر منتشر نزول المسلسلات والدراما التليفيزونية .. مش عارفه منين إكتسبنا العادة دي بس بقينا نستني شهر رمضان عشان نشوف أحدث المسلسلات اللي بتنزل وكل الممثلين بيتنافسوا فيها ! أنا أتولدت لاقيت الموضوع ده بصراحه!
- الخيم الرمضانية: في مصريين كتير بعد الفطار بيبقوا عاوزين يخرجوا ويشوفوا أجواء رمضان في الشارع فا بيروحوا أماكن إسمها (خيم رمضان) بيبقي فيها جو لطيف من الرقص الفلكلور المصري (رقص التنوره) وأغاني رمضان.
أعتقد غطيت في المقاله دي علي قد ما أقدر المظاهر الرمضانية بشكل مختصر في مصر .. وليه لو نزلت مصر في الشهر ده حتحس إحساس غريب .. الشوارع فاضيه ... الهدوء اللي شبه الهدوء في اليابان وقت الأفطار.. الزحام اللي حتلاقيه قبل رمضان بأسبوع في الشوارع عشان الناس بتشتري المستلزمات الرمضانية... وحاجات كتيرة كدا!
بس حتقول طيب والمسيحيين في مصر وضعهم إيه في الشهر ده ؟ بيحتفلوا معانا عادي بأجواء رمضان ودي أكتر حاجه بحبها في مصر كلنا واحد وبنعزمهم يفطروا معانا حتي لو دياتنا مختلفه 😊.
مش عارفه أحكي إيه ولا إيه عن أجواء رمضان في مصر خايفه أكون نسيت حاجه بس أحتفالنا رمضان وطقوسنا فيه صعب تتكتب في مقاله واحده بس عشان كدا أنا قلت الحاجات الأساسية وبعدين حبقي أختار كل حاجه مميزه في رمضان في مصر وأكتب عنها بالتفصيل.
المصريين يمكن طول السنه بيناكفوا في بعض .. بس في الشهر ده سبحان الله بنبقي كلنا واحد.. بنفطر مع بعض في نفس الوقت وبنصلي مع بعض وبنسيب كل خلافاتنا علي جنب.. ساعات بتمني أن تكون روحنا طول السنه زي روحنا في شهر رمضان كدا (بس بدون صيام ).
جربوا الأجواء الرمضانية في مصر وأوعدكم أنكم مش حتلاقوا زيها خالص في أي بلد تانية!
