هل الأعياد في مصر بتقتصر بس علي الأعياد الأسلامية ؟؟ الأجابة لأ!
النهردة في المقالة حنتكلم عن عيد بنحتفل بيه فية مصر سواء مسلمين أو مسيحيين وهو في الحقيقة من أجمل الأعياد اللي بحبها وهو (عيد شم النسيم).
ناس كتير ما تعرفش المعلومة دي بس عيد شم النسيم هو عيد في الأصل مصري قديم بيعود لأكتر من 4700 سنة حيث أنه كان بيحتفل بيه المصريين ببداية فصل الربيع وأعتدال الجو وكان أسمه في الأصل (شمو) و دي معناها (بعث الحياة) عند المصريين القدماء .. وبيرتبط معاده بأعتدال الجو وبيكون جو ربيعي مُشرق. وعيد شم النسيم بيمثل بداية موسم الحصاد وتجدد الطبيعة وتجدد الحياة وحالياً بيجي في اليوم اللي بعد عيد القيامة المجيد بتاع المسيحيين.
السبب الرئيسي للاحتفال هو الترحيب بفصل الربيع وتفتح الزهور وبقي فرصه ومناسبة أجتماعيه عشان الناس تتجمع وتخرج من ضغوطات الحياة.
.webp)
طيب هل فيه أكلات معينه في عيد شم النسيم؟ طبعااااااا!
أولاً في عيد شم النسيم بنسلق البيض ونلونه وده بيبقي نشاط جميل قوي للأطفال ولحد دلوقتي أنا شخصياً بعمله. والبيض في المناسبة دي بيرمز للخلق وبداية الحياة.
تاني حاجه من أشهر الأكلات في عيد شم النسيم هو الأسماك المملحه زي الفسيخ والرنجه وده بيرمز للخير والرزق في الفكر المصري القديم.
وتالت حاجه البصل حيث أنه يٌعتقد أنه بيطرد الأرواح الشريرة واخر حاجه (الخس) وهو رمز الخصوبة.
وأستمر لأحتفال بشم النسيم بنفس الشكل ده من العصر المصري القديم لحد دلوقتي بدون أن يفقد هويتة وبقي يعتبر أجازة رسمية في مصر عشان نحتفل بيها بمختلف ديانتنا.
بس خلينا بقي نتعمق أكتر في أكله الفسيخ والرنجه! الفسيخ ده هو عبارة عن سمك بوري مملح ومخمر أو مجفف ومملح والشخص اللي بيعمله أسمه (الفسخاني) وجي من كلمه (فسيخ) والفسخاني بيعمله عن طريق أنه بيخلل السمك في ملح خشن فترة طويله حوالي 15 يوم.. الحقيقه انا عمري ما حيبت الفسيخ عشان ريحته نفاذه جداً وبصراحه بعتبرة سمك معفن! والفسيخ يعود تاريخه للعصور المصرية القديمة حيث أن المصريين القدماء كانوا بيحفظوا السمك بالملح.
عاده طبق الفسيخ ده بيتاكل بالعيش المصري البلدي مع البصل الأخضر والليمون والطحينة.
ومن الأفلام المصرية اللي مثلت منظر أحتفال المصريين بشم النسيم هو فيلم (عسل أسود) أيوا هو أسمه عسل أسود ! زي ما شايفين في الصورة مشاهد من الفيلم العائله قاعده في الجنينه والممثل بياكل الفسيخ وهو مش قادر يستحمل ريحته !
أما الرنجه بقي ودي انا بحبها وباكلها عادي.
الرنجه دي نوع من أنواع الاسماك وبتكون مدخنه وبتتعمل علي شكل سلطه رنجه مع الطحينه والليمون والبصل والزيت وبصراحه أنا بعشقها جداً!
فيه ناس في مصر بقي مش بيحبوا لا الرنجه ولا الفسيخ فا بياكلوا تونه ويلا أهي نوع من أنواع الاسماك برضه!
