الأسكندرية .... عروس البحر المتوسط ومن أجمل المدن في مصر. وكل مابلاقي نفسي عاوزه أكسر الروتين بركب القطر وبروح إسكندرية صد رد كدا أنتعش وأرجع لصداع القاهرة تاني.
مش حيكفيها مقالة واحدة ومحتارة بجد أزاي أنظم مواضيع عن مدينة الاسكندرية خصوصاً أني بروح هناك عشان أعمل حاجات بسيطه جداً مش بتخرج عن التمشية علي البحر وأني اروح أكل.. فا قررت أني أكتب مجموعه مقالات واقولكوا أنا شخصياً بعمل ايه أما بسافر أسكندرية من أول ما بركب القطر لحد ما بوصل هناك. وحقولكوا كمان أيه المتاحف اللي رحتها هناك في مقالات قادمه أن شاءالله. بس بدايةً المقالة دي حقولكوا فيها الروتين البسيط اللي بعمله ومش بيتغير كل ما بروح أسكندرية.
عشان تروح إسكندرية بتركب القطر من محطة مصر وممكن تحجز أونلاين بس في الفيديو المرفق أنا ساعتها ركبت قطر (التالجو) هو أحدث قطر في المحطه كسعر أغلي من القطر العادي بس هو سريع جداً ومش بيقف في المحطات وبتروح دايركت من القاهرة للأسكندرية.
أول ما بوصل أسكندرية أول حاجه بعملها وبقي روتين "مُقدس" هو أني أروح أفطر في أشهر كافية فيكي يا أسكندرية وهو كافية (ديليس).
المنيو بتاعته متنوعه جداً جداً مابين الفطار المصري واليوناني وأوبشنز كتيرة جداً جداً وكل مره بروح بجرب حاجه جديدة. والصور اللي تحت دي تقريباً كل أنواع الفطار اللي جربتها منه.
الكافية ده مشهور جداً بحلوياته المتنوعه من الكيك بكل أنواعه للتشير كيك والبراونيز وتشكيلات متجددة علي طول من جميع الحلويات اللي ممكن تتخيلها والتي لا تتخيلها .. والمميز في الكافية ده كمان أحجام الحلويات! بجد عملاقه جداً!
يعني أنا جربت من عنده الأبل باي وكرواسون بالسكر والمكسرات وتشيز كيك عليها صوص شوكولاتة (دي بجد كانت رهييييبة جداً) وحاجات دي زي اللي في الصور دي:
.webp)
