العيش البلدي المصري… من أفران مصر لأسواق أمريكا!
العيش البلدي المصري مش مجرد عيش، ده جزء من الهوية المصرية من أيام صناعة العيش عند قدماء المصريين لحد أفران العيش وسفرة الاسرة المصرية دلوقتي.
العيش البلدي المصري من أساسيات الأكل في مصر ولا غني عنه إطلاقاً! إحنا ممكن نستغني عن الرز ولكن رغيف العيش البلدي المصري من أهم المأكولات علي السفرة المصرية.
في المقالة مش حكتب طريقة عمل العيش .. بس حكتب عن أهمية رغيف العيش البلدي في حياة المواطن المصري الأصيل.
مبدئياً كلمه (العيش) هنا معناها حياة أو (يعيش/يحيا) وده عشان المواطن المصري لا يحيا إلا بوجود رغيف العيش البلدي في بيتة!
العيش البلدي المصري بيتعمل في محلات/أفران العيش البلدي في مصر اللي موجودين في كل منطقه ..بل مافيش حي ولا شارع فيكي يا مصر الا أما تلاقي 4 محلات أفران عيش بلدي ! من الصبح بدري حتلاقي كل محلات أفران العيش البلدي بتطلع رغيف العيش المصري بجميع الأحجام. ومش بس كدا ده من أهم المناظر في الشارع المصري هو منظر الشخص اللي بيوزع العيش في المناطق وهو سايق العجله وشايل فوق دماغه مسطح خشبي كدا وعليه العيش في منتهي الفن والمهارة والاتزان لو قام زلزال حتلاقيه سايق العجله وفوق دماغه مشنه العيش بكل الثبات الأنفعالي في الدنيا.
العيش البلدي المصري مش بس شكله مميز بس كمان طعمه إدمان! ازاي شويه دقيق و مياه وخميرة يعملوا العظمه دي كلها !
بداية من أن الفول والطعمية بيتعملوا في العيش البلدي المصري وطبق الفول مش بيتغمس غير بالعيش البلدي.. والملوخية بتتاكل بالعيش البلدي المصري.. المسقعه بتتاكل بالعيش البلدي المصري ! العيش البلدي حتلاقيه علي سفرة كل أسرة مصرية.
وده من أيام مصر القديمة.. لو رحتوا المتحف القومي للحضارات حتلاقوا هناك بقايا من العيش وحبوب القمح والشعير لاقوها في مقابر المصريين القدماء إعتقاداً منهم أنهم حيحتاجوا في العالم الأخر بعد الموت. ومش بس كدا ده فيه وثايق بتأكد أن المصريين القدماء أول من إكتشفوا الخميرة في الألف الرابع قبل الميلاد وطحنوا القمح في نفس الفترة دي.
ده يعني من جمال العيش البلدي المصري واحد عبقري في أمريكا نزل منتج العيش البلدي المصري فروزن والمصريين هناك جالهم إنهيار وإختفي من السوق عشان كان بيتباع في ثواني ! الباكيت فيه 5 أرغفه ب 2.50 دولار يعني حوالي ب116 جنية مصري ! ده أنا في مصر بجيب ال 5 أرغفة ب 10 جنية يعني بأقل من ربع سنت !
حقيقي اللي فكر في أنه يعمل المنتج ده برا مصر عبقري ! الفكرة بسيطة جداً بس ماكنش متوقع أنها تعمل الضجه دي كلها ! ده أنا حروح أفتح فرنة عيش في تكساس ولا نيو جيرسي و ابقي مليونيرة علي كدا ! أنا عرفت الموضوع ده من الفيديوهات علي التيك توك وأن المصريين هناك في أمريكا كانوا فرحانين جداً بسبب وجود المنتج ده. أصيل يابن بلدي مسافر أمريكا هربان من بلدك و حتموت علي رغيف العيش المصري يا ضينايا! ما أنت كنت عايش معانا متهني وبتجيبه ب 10 جنية ! اهو رحت تجيبه بالدولار من أمريكا!
أنا بعشق العيش البلدي المصري من كل قلبي لو كان لنهال رمز واحد حيكون غالباً حلة ملوخية ومعاها العيش البلدي المصري!
ولو الموضوع ده عجبك، اقرأ كمان: العسل الأسود + الطحينة = أغرب ميكس… بس أحلى طعم! ومن العصر الفاطمي لحد دلوقتي.. حكاية حلويات المولد في مصر!
