أسامي الأكل المصري غريبة جداً والأكله اللي في المقال ده من الأكلات اللي الجيل الجديد في مصر مايعرفهاش وبتتنسي من المطبخ المصري والحقيقة أستغربت أن فيه نسبة مش قليلة من المصريين بالذات الجيل الجديد مش عارف أنها أكله أصلاً بسبب أسمها الغريب .. أسم الأكله (سد الحنك).. وسد الحنك معناها الحرفي (سد حنكك) يعني أقفل بوقك أو إخرس بمعني أصح! وهي حلويات مش حاجه حادقه.
وأما مره قلت إسم الأكله دي أتقالي : أيه ده! هو ده أسم أكل أصلاً ؟! مش سد الحنك ده اللي هو أخرس أو اقفل بقك! حسيت أني بجد من العصر الحجري كوني أني فاكرة الأكله دي أصلا!
بس مش غريب أن الأكله دي بتتنسي تقريباً بسبب التغير الرهيب في زوق أكل المصريين مع الوقت خصوصاً بين الشباب والأجيال الجديدة. الأكله دي أتسمت كدا بسبب أنها بتشبع بسرعة وبتخليك من أقل كمية مش قادر تاكل تاني وكأنها بتسد (البق) عن الأكل بسبب دسامتها! ناس كتير أفتكرت أن سبب تسميه الحلويات دي كدا بسبب أنها بتخلي الواحد يقلل رغبته في الكلام بس المصريين لاحظوا أنهم بعد ما بياكلوا الأكله دي بعدها مش بيبقوا قادرين ياكلوا أي حاجه تانية ولا قادر يفتح بقه حتي يشرب من دسامتها ! وكمان بعد ما بياكلوا الأكله دي بيجلهم نوع من أنواع الخمول والكسل وأنه بيبقي عاوز ينام ومن هنا جت تسميتها بسد الحنك بمعني (غلق الفم). وعندنا في مصر هنا أما بنلاقي حد مش بيتكلم كتير بنقوله: "أنت واكل سد الحنك"؟ بمعني أنت ليه ساكت أو مش بتتكلم ! انتوا متخيليين تأثير الأكله دي قد ايه علينا كمصريين !
حالياً الأجيال القديمة بتحاول ترجع الأكله دي في المطبخ المصري بأنهم يعملوا عليها أضافات تناسب زوق الجيل الجديد في الأكل زي أنهم يحطوا عليها شوكولاتة ومكسرات وعسل.
الحلويات دي بتتكون من سمنة ودقيق وسكر ولبن وسمسم محمص.. بتتعمل بأنك تحمر الدقيق في السمنة لحد ما يبقي لونه دهبي غامق وبتدوب السكر في اللبن وبعدها تضيفه علي خليط السمنه والدقيق لحد ما يتماسك القوام ويكون قابل للتشكيل وبتضيف السمسم المحمص وبتتزين بالمكسرات.
بتتقدم بأشكال كتيرة قوي ممكن تتعمل علي شكل كرات صغيرة .. أو بتتحط في الطبق زي ماهي وبتتاكل بالمعلقه. و دي طريقه تقديمها بكذا شكل زي ما موضح في الصور.
