أحب أفهم سر حب المصريين لقنابل السعرات الحرارية دي ! موضوع المقاله النهرده عن قنبله سعرات حرارية من أبو جد مش هزار .. يعني المفتقه وسد الحنك ولااااااااا حاجه جنب ده.. حاولت أدور علي معني لأسمه بس مالقتش غير أنه ممكن يكون تعبيراً عن عوشوائية مكوناته .. وأسم الساندوتش ده (السكلانس) الذي يعشقه الشعب المصري للنخاع! مش مستغربة ليه مرض السكر عندنا هو المرض نمبر وان .. أكيد بسبب البلاوي اللي بناكلها دي !
:سد الحنك
https://egyptopia.net/article/sadelhanak
:مفتقه
https://egyptopia.net/article/Mufattaka
ساندوتش بسيط مكون من رغيف عيش فينو بس جواه (مربي/عسل/قشطة/حلاوة طحينية).
هل فيه ناس تسكت و تقفل الساندوتش علي كدا ؟ لأ! بعض الناس بيحبوا يحطوا عليه شوكولاتة.. طيب أنا متأكدة أن أي حد ياباني بس بمجرد ما يسمع عن الساندوتش الغريب ده حيتعب نفسياً ويجزع من أول قطمه! الساندوتش ده تاكله من هنا وتاخد بعدها حقنه أنسولين من هنا ...
ومع ذلك الساندوتش ده بيبتاع في محلات كتير في مصر وأه فيه ناس بتعشقه جدااااً!
ده من كتر حب الشعب المصري لمكونات الشاندوتش ده أتعمل علي شكل بسكوت ويفر بأسمه و كمان سبريد سكلانس ! أعتقد ده يمشي حاله مع اليابانيين عشان بسكوت ويفر بس بحشوه بسيطه من مكونات الساندوتش ده! ممكن تشتري المنتج ده لاصدقائك اليابانيين كسوفونير مثلاً ...
وطبعاً مش محتاج أقول مش بنصح بالساندوتش ده لحد عاوز يخس ولا عنده سكر .. وبصراحه ما أنصحش بيه أي حد بقي ! أو ممكن الساندوتش 4 ياكلوة مع بعض عشان يقسموا السعرات الحرارية ما بينهم كل واحد يادوبك مثلا 500 كالوري في القطمه .
