المسقعه المصرية .. الأكله الاقتصادية نمبر وان في مصر ! مكوناتها مش مكلفه.. طريقتها في التحضير سهله جداً!
المسقعه من أكلات البيت المصري الاساسية.. أسم ألاكله (المسقعه) أصلها من كلمه (صقيع) يعني (تبريد) عشان الأكله بتتاكل باردة في معظم الدول العربية.
ألاكلة دي منتشرة في جميع الدول العربية وبتتعمل بطرق كتير وبأضافات مختلفه ولكن مكونها الأساسي حاجتين : البدنجان المقلي وصلصه الطماطم.. وأي اضافات تانيه بتبقي علي حسب كل دولة بتعملها بطريقتها.
يُقال أن الاكله مصرية الأصل والبعض بيقول أنها شامية وفي منشئها إختلاف والصحيح أن أصلها يوناني أو تركي وإنتقلت بعدها للشرق الأوسط في أواخر القرن التاسع عشر الميلادي.
في مصر عادة بتتعمل من البدنجان المقلي والفلفل الاخضر المقلي وصلصه الطماطم المسبكة وبرضه منتشر عندنا إضافه اللحمه المفرومة والبطاطس المقلية. في دول تانيه كتير بتتعمل باللحمه المفرومة, أو صوص البشاميل وفي فلسطين ولبنان بيضيفوا الحمص.
المسقعه ليها أسامي تانيه كتيرعلي حسب كل دوله.. في مصر وفلسطين والسعودية بنقول عليها (مسقعه) .. في سوريا بيسموها (مطبق) وفي لبنان (المغمور) والعراق بتتسمي (التبسي).
المسقعه المصرية بتتعمل بأنك تقطع البدنجان شرائح سميكه شويه وتشيل القشرة (وفيه بعض الناس بتقلي البدنجان بقشرته) وترش عليه رشه ملح وتسيب البدنجان يطلع المياة اللي جواه علي مناديل مطبخ وبعدها تقطع شرائح من الفلفل الاخضر وتقلي المكونات دي في كميه غزيرة من الزيت وبعدها تطلع البدنجان والفلفل يصفي الزيت الزائد علي منديل مطبخ.
بعدها بيتم تحضير صلصه الطماطم: بنحط معلقه من الزيت أو السمنه ونشوح 4 فصوص ثوم مفرومين وبعدها نحط عصير الطماطم مع معلقتين صلصه طماطم ومعاهم شويه من الكمون الباودر والملح والفلفل ومعلقه من الخل ونسيب الصلصه تتسبك حوالي نص ساعه.
بعدها بنرصص قطع البدنجان مع الفلفل الأخضر ونحط صوص الطماطم ونحط الصينيه في الفرن حوالي 45 دقيقه وبعدها نطلعها تبرد وبتتاكل مع الأرز أو العيش المصري.
في الفيديو أنا عملتها بأضافه الحمص وما ضيفتش الفلفل الأخضر. الأضافات علي المسقعه بتبقي حسب الرغبه وطريقه تحضيرها المفضله ليكوا. ممكن تتعمل بأضافه الفلفل الحراق كمان لو بتحب الاكل يكون سبايسي. وبرضه إضافات التوابل بتختلف من الشخص للتاني.
طبعاً كعادة الاكل المصري الأكله دي قنبله من السعرات الحرارية والدهون! البدنجان مقلي.. وبتتاكل مع الرز أو العيش .. كاربوهيدرات+دهون= الدايت مضروب بالنووي !
المسقعه من الأكلات الاقتصادية و الشعبية الغير مكلفه عشان كدا منتشر أكلها في البيوت المصرية بصفه كبيرة.. ساعات بتكون جزء من الفطارالمصري مع الفول والطعمية !
فيه طرق صحيه لعملها زي انه بدل ما تقلي البدنجان .. تقطع البدنجان مكعبات و تشوحه في شويه زيت و بكدا تكون قللت كمية الدهون في الاكله وحتكون أقل سعرات حرارية.
