في المقالة دي حنتكلم عن أكله مشهورة جداً في مصر و تعتبر من الأكلات الصحية الغنية بالعناصر الغذائيه و تعتبر من وجبات الفطار المصرية وكمان وجبه بتدفي في الشتا .. الاكله دي هي (البليله).

البليله أكله شعبيه مشهورة جداً في المنطقه العربية .. مكوناتها مختلفه بين مصر وبلاد الشامو الحجاز و العراق .. في مصر أكله البليله أكله مسكرة ( حلوة) و بتعتمد علي القمح .. أما في بلاد الشام والحجاز و العراق تعتبر طبق (حادق) وبتعتمد علي الحمص.

بس البليله المصرية من الوجبات المصرية الشهيرة ببساطتها في التحضير و طعمها الرائع و أنا شخصياً بحب الوجبه دي جداً في الفطار.

بتتكون البليله من القمح المقشور (حبايه القمح بدون القشرة) ولبن... طريقه تحضيرها سهله جداً .. بتنقع القمع لمده 4 ساعات في المياة بعدها بتسويه علي النار لحد ما يكون طري بياخد حوالي 45 دقيقه. وبتسخن لبن و تحطه علي القمح بعد ما يستوي .. تقدر تقول هو عامل زي وجبه الكورن فليكس كدا.. ممكن تحط أي أضافات زي السكر أو المكسرات عليها .. حقيقي طعمها في منتهي الجمال!

القمح اللي بيتعمل منه البليله بيكون جاهز كدا ممكن تجيبه من السوبر ماركت و دلوقتي البليله بتتباع معلبه وجاهزه علي الأكل علي طول كمان.

حالياً الاكله دي برضه بتتنسي و كتير مش عارفها من الجيل الجديد فا عشان كدا حبيت أكتب المقاله البسيطه دي عنها .. أعتقد تقدروا تعملوها في بلادكوا عشان مكوناتها متوفره لو عندك قمح و لبن خلاص كدا تقدر تعملها بكل بساطه!