فن الدمى اليابانية… مش مجرد عرايس!
من فن تقليدي لفن بأسلوب معاصر.. تجربة في منتهي الأختلاف
المقالة دي حتكون عن زيارتي لمعرض من أهم الفنون اليابانية وهو (فن صناعة الدمي اليابانية).
اللي خلاني أكتب المقالة دي أن مؤسسه اليابان أستضافت أحد أهم الفنانين في صناعة الدمي اليابانية وهو الفنان ( ناكامورا هيرومنيه).
ومش بس أستضافته بل وكمان أتعمل معرض لعرض جزء من أعماله في صناعة الدمي اليابانية التقليدية والمعرض ده أبتدي من يوم 9 أبريل وحيخلص يوم 29 أبريل في مركز الجزيرة للفنون بالزمالك.
ناكامورا هيرومينيه ولد عام 1986 و بيتميز بأسلوب رائع في تصميم الدمي اليابانية و عمل علي تطوير الدمي اليابانية الكلاسيكية لمستوي أعمال فنية معاصرة. وكان السؤال اللي ألهم الفنان ناكامورا هو سؤال واحد : لو أن صانع دمي ماهر من عصر الأيدو سافر عبر الزمن لعصرنا الحالي يا تري ايه هو نوع الدمي اللي كان حيصنعها؟
ومن هنا صمم الدمي اللي حتشوفوا صورها في المقالة فن متقن جداااااا وتفاصيل دقيقة وماهرة عالية ومش بس كدا تعابير وشوش الدمي تكاد تكون نابضه بالحياة! أما أتفرجت علي تصاميم ودقه صناعه الدمي اليابانية دي ماجاش في بالي غير: ده الطبيعي من اليابانيين!
كمان الفنان ناكامورا عمل ورشه ومحاضرة يعلم فيها بعض الحاضرين عن تلوين الدمي بس مالحقتش أحضرها!
كان بس نفسيييييي أنهم يعملوا كورنر سوفونيرز نشتري منه ماديليات أو أي حاجه بترمز للمعرض ده من أشكال الدمي اللي كانت معروضه كانت حتبقي ذكري جميلة جداً!
أكتر عرايس عجبتني من غير ما أفكر هي (داروما Daruma ダルマ) ! حتسألني ليه حقولك عشان ورا العرايس دي معني جميل جداً فا هي بتعتبر رمز للمثابرة والحظ السعيد وهي بالنسبة لي بتمثل رمز للعزيمة والأصرار علي تحقيق أحلامك وأهدافك فا أما بتشتري دمية (الداروما) بتكون عينها الاتنين لونهم أبيض أول حاجه بتختار هدفك أو أمنيتز وبتلون العين الشمال ولما تحقق الهدف ده بتروح ملون العين اليمين. فا تلوين العين بتاعت دمية الداروما كأنه وعد بتقطعه لنفسك أنك حتسعي ورا أحلامك وتحقق أهدافكمهما كانت العقبات اللي حتواجهك وبتفكرك دايماً بأنت كنت عاوز ايه وقطعت الوعد ده لنفسك ليه.
معني دمية (الداروما) بالنسبه كبير قوي قوي عشان حتي أما سافرت اليابان في سنه 2012 رحت معبد أسمه (كاتسوو جي Katsuō-ji 勝尾寺) مع صديقتي اليابانية في أوساكا وهناك في المعبد ده كله عبارة عن دمي داروما في كل حته جوه الشجر وفي كل حته! أنا من هناك أشترت ماديلية و سكارف عليه (داروما) وجبت كمان واحده داروما وفتحتها عشان أشوف حظي ايه فا طلع حظي وحش جداً فا صاحبتي قالتلي اربطي الورقه في الحبل ده عشان حالك يتصلح يابنتي قلتلها ومالو! ومن ساعتها لسه حالي مايل بجد!
المهم.. كمان من أجمل العرايس اللي شوفتها وهي اللي محطوطه في مخرج المعرض دمية كبيرة قوي في حجم جسم الانسان تقريباً !
المعرض لطيف جداااا وهو لسه شغال لحد أخر شهر أبريل والدخول مجاناً فا متفوتوش الفرصه دي!
