عارفين لو انا قابلت نفسي وأنا مراهقه وبسمع أغاني ياباني وقلت لنفسي: عارفه يانهال أنك حتحضري حفله فيها مغني ياباني بيغني Visual Kei في سنه 2026 ؟ ماكنتش حصدق نفسي بجد!
كتبت قبل كدا عن أكبر إيفينت لمحبي الكوسبلاي والأنيمي وهو إيفينت أيجي كون (EgyCon) تقدروا تقروا الموضوع من هنا :
(https://egyptopia.net/article/Egycon)
وزي ما كتبت في المقالة اللي فاتت أن إيفينت أيجي كون بيبقي مجمع محبي الأنيمي الياباني والكوسبلاي وأي حاجه متعلقه بالثقافة اليابانية.
وكل مره الأيفينت بيتعمل بيبقي فيه فقرات ثابته زي فقرة الرقص الياباني ومسابقات عن الأنيمي.
بس المرة دي في الأيفينت كانت مؤسسة اليابان مستضيفه مغني ياباني بيغني بستايل ال Visual Kei وأسمه سانا تاكيزاوا (Sana Takizawa) بس قبل ما نخش عن تفاصيل الايفينت المرة دي تعالوا نعرف الاول ايه ستايل ال Visual Kei.
ビジュアル系كلمة Visual هي هي معناها بالانجليزي (بصري) و 系 kei الكانجي ده معناه (ستايل) فا بمعني أخر معناها موسيقي بصرية .. هو ستايل متاخد من الستايل الغربي (سواء من أوروبا أو أمريكا) في الروك والميتال بيبقي فيه عزف بالجيتار برضه بس الفرق بينهم و بين الستايل الياباني أن المغني الياباني أو الفرقه اللي بتغني بالستايل ده بيبقي عاملين ستايل ملابس مختلف وملون بألوان صارخه مع ميكب وستايل شعر مميز ليهم .. أشهر الفرق اللي بتعزف بالستايل ده هي فرقه أكس جابان (X-Japan).
نرجع بقي لكلمنا علي الأيفينت .. زي ما قلت بجانب الفقرات الثابته من الرقص الياباني فيه كمان مسابقه الكوسبلاي واللي محبي الأنيمي الياباني في مصر بيتقمصوا الشخصيات اللي بيحبوها من أي أنيمي بيحبوه.
بصراحه في الأيفينتات السابقه كانوا المتسابقين عاملين أداء أحسن من كدا بس مش حنكر من أكتر الكوسبلاير اللي عجبني هو اللي عامل شخصية Pyramid Head من اللعبه المعروفه (Silent Hill).
بعد ما كل الفقرات ما خلصت جت فقرة المغني الياباني واللي أنا كنت متحمسه ليها جداااااااااا وأصلاً ده من الأسباب اللي خلتني أقرر أحضر الأيفينت عشان حسيت أنها حاجه جديدة وكنت مش مصدقه أن أخيراً ممكن أحضر حاجه زي كدا لايف.
أداء المغني Sana Takizawa كان جامد جداااااا غني حاجات خاصه بيه وكمان قعد يلعب معانا ويسألنا عن الأكل المصري ويقولنا عن الأكل الياباني وبعدين عمل مسابقه أننا نعرف أسم الأنيمي من أنترو الغنيه بتاعته وكان جي متعلم كلمتين يقولهم بالعربي والحمدالله قالهم وعرفناة علي المحشي والملوخية وفي الاخر قعد يقولنا Where is my koshari ? فا أحنا نرد عليه ونقوله : Here !
والمفجأة الكبري بقي أنه عزف بالجيتار أغنيه عمرو دياب (حبيبي يانور العين) والله حسيت أنها حاجه جليتش في الماتريكس كدا ! بجد كنت مبسوطه جداااااا أني حضرت حاجه زي دي ونفسي بجد تتكرر تاني ! أنا بصراحه بحب باند روك ياباني أسمه (جيروجاميش) ギルガメッシュ وبسمعهم من ساعه ما طلعوا في 2003 هل مستحيل أشوفهم في مصر ؟ ليه لأ ممكن برضه !
بس يمكن لو حقول تعليق سلبي واحد هو أنهم ماكانوش مظبطين صوت المايك والأغاني وكل شوية بتقطع فا الموضوع كان يعصب وحصل تأخير كتير قوي لحد ما الفقرات اللي المفروض تتقدم في الأيفينت تبتدي !
عموماً بغض النظر عن الحاجه السلبية دي كعادتي كل أيفينت لازم أجيب حاجات من الستورز هناك ! و أيوا في الايفينت دايماً بيبقي فيه ستورز بتبيع كل الحاجات المتعلقه بالأنيمي من فيجرز وهدوم وبوسترات ومانجا ومجات وكل حاجه !
انا بقي أشتريت الحاجات دي عشان بقالي فتره مهووسه بأنيمي (Blue Lock) فا جبت بوسترات و نوت بوكس.
أتمني الأيفينتات اللي جايه يكون فيه فقرات جديدة تانيه ويكون فيه تنوع أكتر في محتوي الأيفينت عشااااان التذاكر بقيت غالية قوووووي (ب 850 جونييييه) حوالي 2612 ين . و أأأه مش عاوزه أنسي كمان أقولكوا أن هناك فيه محلات بتيع أكل فا ما تقلقوش مش حتجوعوا ! أنا جبت ساندوتش تونه بصراحه عشان عامله دااااايت !
