في الحقيقة مش عارفه أبتدي المقالة دي إزاي .. خصوصاً أني حابه أتكلم عن مشاعري وذكرياتي بخصوص أول مره أروح فيها أسكندرية في سنه 2014 بس مع 2 من اللي كانوا أعز صحابي بس أنقطعت علاقتي بيهم من من اكتر من 10 سنين. فا أما بشوف الصور دي ساعات بيجيلي أحساس زعل كبير جداً عشان ده تقريباً من أحلي الأيام في حياتي لاننا كنا أنا و(صديق وصديقه) كان نفسنا فشخ نسافر مع بعض فا قررنا نسافر يوم صد رد لأسكندرية وللأسف أضطريت عشان أسافر اليوم ده أني أكدب علي والدي وأخترعت قصه كلها كدب في كدب عشان كان نفسي أسافر معاهم ( سامحني يابااااا). زيارتي للأسكندرية في اليوم ده كنات ل 3 أماكن (مكتبة الأسكندرية الشهيرة) و قلعه قايتباي .. ومحل ملابس أسمه (بلوب Plop)

كان المحل ده مشهور وسط الشباب اللي بيسمعوا ميتال وروك عشان كان بيبيع تي شيرتات ميتال لجميع الفرق المشهورة زي ميتاليكا وAC/DC و Gun’s nd Roses. حنتلكم عليه في المقالة دي بالتفصيل ما تقلقوش يعني !

كل ما بشوف الصور دي بيجيلي أحساسيس كتيرة قوي أولاً منهم أني ستايل لبسي ما أتغيرش 😊! نفس الشيرت الأسود علي البنطلون الأسود حتي وأنا دلوقتي داخله علي 40 سنه برضه محتفظه بنفس الستايل!

تاني أحساس بيجيلي هو أني كنت مبسوطه جدااااااااا بأحساس الأنطلاق والحرية .. أي نعم ساعتها ماكنش معايا فلوس وتايهه في الحياة ومش عارفه أنا عاوزه ايه بس كمية السعادة اللي كنت فيها مش طبيعية ! دلوقتي بقي معايا فلوس الحمدلله بس مكتأبة عشان ماحققتش اللي نفسي فيه في الحياة بالرغم أني قاعده بحاول بقالي سنين طويلة بس في الأخر حاسه أني تعبت من المحاولات جداً .. في العشرينات كنت شباب وفيا طاقه دلوقتي حاسه أني بتعب بسرعة و كمان زهقت من المحاولات اللي مالهاش أي معني غير أنها فرهضه وخلاص! فا من هنا قررت أعمل البلوج ده عشان أولاً مش عاوزه أنسي الياباني حتي لو حكتب بس.. وثانياً عشان الموضوع بصراحه مسلي جداً ومن وأنا صغيرة كنت بحب أكتب عن مغامراتي اللي كانت علي شكل (يوميات).

تالت حاجه بفتكرها أما بشوف الصور دي بقي أحساس (الحزن) أن علاقتي بأصدقائي دول أنتهت فا أتحولت الذكري الجميله دي لأحساس كأيب كدا .. عشان أكون صريحه حد فيهم هو اللي قطع معايا ومش عارفه ليه بدون سبب أتمسحت وأنقطعت العلاقه بيا .. وحد تاني علاقتنا أنتهت بالبرود وأني كنت تعبت من أني أكون الطرف اللي بيتواصل فا الصديق ده حتي ما تمسكش بيا يعرف أنا أختفيت فين.

فا من الأخر ذكري ذهابي للأسكندرية في 2014 أتحولت ل (ذكري جميلة جداً بس مع الناس الغلط).

في مصر الحياة اليومية البسيطه مش بتتغير بسهولة .. فا مكتبه أسكندرية علي حطه أيدك من 2014 وهي زي ماهي يمكن بس ممكن أسعار التذاكر اللي أتغيرت ! الحقيقة المكتبه دي مفيده جداً لاي حد عاوز أي كتاب أو عاوز يذاكر المكتبه مجهزة بكومبيوترات وجو هادئ جداً.. ولكن أنا كنت رايحه أشوفها و أتصور وشكراً علي كدا ! تقدر تتصور جوه بس بهدووووء جداً عشان ما تزعجش الناس ..أنا خدت شويه صور برا المكتبه زي ما حتشوفوا كدا.

بعدها طلعنا أنا وأصدقائي اللي مابقوش أصدقائي للقلعه ! بصراحه أنا خدت صور كتير هناك معاهم وكنت نسيت اصلا الصور دي وافتكرتها وأنا بحضر للمقالة دي وقعدت أعييييييط بجد ! دموعي نزلت وأتمنيت لو كنا لسه مع بعض .. عشان كنت عارفه صحابي دول حوالي 10 سنين .. والحقيقة أنا أتغيرت عن زمان قوي ساعات بتمني أرجع زي زمان أما كنت عفوية وعلي طبيعتي بس الزمن وصعبانيات الحياة غيرتني. ممكن بس محتفظه بستايل الميتال هيد عشان أنا بعشق موسيقي الروك والميتال من وأنا 14 سنه.

مش حابه أقعد أدي معلومات عن قلعه قايتباي أما ممكن تسأل Chatgpt حاسه أن شرح معلومات عنها بالياباني صعب عليا فا حكنسل الجزئية دي بصراحه بقي !

وكمان بالمره ممكن تقروا عن (منارة الأسكندرية) اللي كانت من عجائب الدنيا السبعه عشان كانت أول منارة تتبني في العالم وأتبنت في عهد بطليموس الثاني عام 270 قبل الميلاد وأتدمرت في زلزال سنه 1323 وأتبني مكانها قلعه قايتباي الحالية.

المهم دي صوري هناك في القلعه أما كنت مفعمه بالأمل والحياة والطموح ودلوقتي كل ده مات ورميته في أقرب زبالة. (خفيت صور أصدقائي للخصوصية).

وفاكرة ساعتها بعدها رحنا برضه كوستا اللي عند كوبري ستانلي .. يا جماعه لازم تقعدوا هناك .. مش عشان القهوة في كوستا حلوة لا أبسلوتلي .. بس عشان المنظر من علي الكافيه ده قدام كوبري ستانلي في أسكندريه منظره جميله جدااااااااااا.. ودي صوره حديثه صورتها السنه اللي فاتت هناك وبصراحه ببقي مش عاوزه أقوم أروح .. كافيه كوستا اللي عند كوبري ستانلي معروف بس عشان القعده اللي بتطل علي المنظر ده!

كوبري ستانلي:

وأخر حاجه بقي رحنا محل (بلوب Plop) اللي قلتلكوا عليه فوق .. المحل ده كان له شنة ورنه في الوقت ده عشان هو الوحيد اللي كان بيبيع شيرتات ميتال أوريجينال من برا ! وكان بيبيع كل حاجه متعلقه بستايل الناس اللي بتحب تركب موتوسيكلات هارلي ديفيدسون وسلاسل وحاجات كتير قوي .. بعدها حالياً غير البزنس بتاعه وبقي محل بيرسينج و بيبيع مادليات أو أكسسوارات برضه ليها علاقه بباندات الميتال وكدا!

فا أنا أتصورت جوه المحل من باب ياااااه ايه العظمه دي وكنت مبسوطه قوي عشان ماكنتش فيه ساعتها في القاهرة محلات بتبيع الحاجات دي.

أتمني ما تكونش المقالة كانت كأيبه بس زي مانتوا عارفين ده بلوج مش موقع سياحي ! و نتقابل المقالة اللي جايه علي خييييرز!