ياتري الجواز في مصر عامل إزاي؟ وايه هي العادات بتاعتنا في في مراسم الجواز من الخطوبه للفرح؟
بصراحه عادات الجواز في مصر مختلفه حسب كل مدينة وكل عائلة .. وتقاليد الزواج عندنا أتغيرت وبتتغير مع تدهور الظروف الأقتصادية وأختلاف الأجيال .. وعادات الجواز في المدن الكبيرة زي القاهرة بيبقي مختلف تماماً عن الجواز في الريف. وبصراحه عشان الموضوع معقد شرحه بالنسبة لي باللغة اليابانية فا حاولت في المقالة دي أبسطة علي قد ما أقدر وكمان أقول أكتر حاجه شائعة واللي أنا شخصياً أتجوزت عليها.
أول حاجه تعارف الست والراجل بهدف الجواز بيختلف طبعاً ساعات فيه قصص حب بتنشأ لطبيعه مثلاً أنهم بيروحوا نفس الجامعه أو الشغل .. وساعات بيبقي فيه جواز بنقول عليه (صالونات) بيبقي شخص بيعرف أتنين علي بعض وعندهم رغبه في الأرتباط بهدف الزواج ولو فيه توافق بيتم الارتباط .. المهم الجواز في مصر بيبقي عموماً بالمراحل التالية:
1- الخطوبة:
الخطوبة هي زي المرحله اللي بيقطعوا فيها وعد بالزواج. وعشان أخلي الموضوع بسيط بمجرد ما بيتم الأتفاق علي الأرتباط وموافقه عيله الراجل والست علي الأرتباط ده الراجل بيجيب (شبكة) والشبكه دي بتبقي هديه بيقدمها الراجل للست وقت الخطوبه .. بتنزل هي وهي ينقوها فيه ستات بتحب تشتري الشبكه دهب أو ألماظ .. الشبكه بتبقي عبارة عن سلسله معاها أسوره وحلق وخاتم .. وفي الخطوبه البنت بتعمل حفله الخطوبه عندها في البيت وهي اللي بتتكلفها والراجل بيقدملها الشبكه ودبله الخطوبه وبيبقي إعلان عن إرتباط الشخصين دول ببعض وبيبقي حفله بيتعارف فيها العيلتين علي بعض.
فترة الخطوبه مالهاش مده ثابته فيه ناس بتتخطب سنه أو أتنين علي حسب تجهيزاتهم لبيتهم اللي حيعيشوا فيه بعد الجواز.. البيت طبيعي الراجل بيوفرة في رجاله بتشتري بيوت بس حالياً مع تدهور الحالة الأقتصادية فا معظم الناس بقيت بتأجر بيوت.
2- كتب الكتاب (عقد الزواج):
كتب الكتاب أو عقد الجواز بيتعمل عند شخص أسمه (المأذون) و المأذون هو الشخص اللي بيبرم عقد الجواز الشرعي رسمياً .. وكتب الكتاب بيتم في المسجد في أطار رسمي شوية .. المأذون بيقول حاجات ثابته في عقود الزواج الأسلامية وبيتم التوقيع علي بعض الأوراق عشان يبقي زواج الشخصين رسمي وبيبقي حاضر المناسبة دي أهل العريس والعروسه وبكدا بيكونوا متجوزين رسمي.
في بعض العائلات بيعملوا كتب الكتاب والفرح في يوم واحد وفيه ناس (أنا منهم) كتبت الكتاب وعملت الفرح بعدها بشهرين.
3- الفرح:
الفرح تكاليفه كلها بتكون علي الراجل وبيبقي زي اي فرح تقليدي العروسه بتلبس فستان فرح وبيبقي حفله فيها رقص وغني وزغاريط! بجد تجربه الأفراح في مصر حلوة قوي لو جاتلكوا فرصه تحضروها ما تفوتهاش!
فيه بقي حاجات فرعية كدا بتختلف مابين كل عائله وعائله زي مثلاً تجهيزات البيت فيه بعض الأشخاص (وأنا منهم) بيشاركوا الراجل في تجهيز البيت يعني مثلا كل أوضه في البيت بتتقسم بين كل شخص بالنص لو مثلا أوضه نوم وتمنها 10000 جنيه مثلاً فا الراجل يدفع النص والست النص. ومثلاً كل الحاجات الكهربائية تكلفتها علي الراجل. وفيه مناطق في الأرياف الراجل بيجهز كل حاجه والست مش بتخش غير بحاجاتها الشخصية فقط.
يعني بصراحه فيه تفاصيل كتير صعب تتشرح في الجواز في مصر علشان عادات الجواز مش ثابته عندنا.. يعني مثلاً من ضمن الحاجات اللي عليها أختلاف كبير حاجه إسمها (القايمه) ودي زي وثيقه لازم الراجل يمضي عليها بكل محتوايات شقه الزوجية بتضمن أنه لو حصل طلاق كل الحاجات في الشقه تكون من حق الزوجه حتي لو هو دافع فلوسها.
فيه بعض الناس بترفض الموضوع ده ومش بتعمله وبعض العائلات بترفض أن الزواج يتم من البنت الا بالقايمة دي.
ماعنديش فكره بجد الجواز بقي في الأرياف عامل أزاي بس اللي أعرفه أنه مكلف جداً علي الراجل عشان هو اللي بيتحمل مسؤلية تكاليف كل حاجه.
يعني عموماً ده بأختصار شديد التقاليد المتعارف عليها في الجواز في مصر .. ممكن أكون أختصرت بزيادة بس السبب هو أن فعلاً كل عيله مختلفه عن التانية وفيه إتفاقات بتحصل من الطرفين بخصوص مراسم الجواز وكدا فا الموضوع مش ثابت قوي.
