في المقالة دي عاوزه أحكي عن زيارتي التانية للمتحف المصري الكبير ! أول زيارة ليا ماكنش لسه ساعتها نقلوا قناع توت عنخ أمون ومقتنياتة .
وفي 1 نوفمبر 2025 تم أفتتاحه رسمياً بعد نقل كل مقتنيات الملك توت عنخ أمون وكمان أتعرض مقتنيات له أول مره تتشاف وماكنتش محطوطه في المتحف المصري بالتحرير.
بس خلونا قبل ما نخش في تفاصيل صالة عرض توت عنخ أمون نتفرج علي حاجات مميزة من أول مدخل المتحف.
علي مدخل المتحف فيه مسله كبيرة.. الملك رمسيس الثاني عمل أكتر من 10 مسلات بمنطقه أسمها (تانيس – صان الحجر) في شرق الدلتا.. والمسله اللي علي مدخل المتحف بتعتبر أطول المسلات اللي أتعملت في تانيس.
حيث أن ارتفاعها 16 متر والمبهر في المسله دي أن وزنها 87 طن وأترفعت علي منصه مدعومه بأربعه أعمدة ضخمه وبكدا تكون أول مسله معلقة في العالم وكمان عشان زوار المتحف يشوفوا خراطيش رمسيس الثاتي المنحوته تحت المسله.
وطبعاً زي ما كلكوا عارفين جوه المدخل بتاع المتحف حتلاقوا تمثال رمسيس الثاني بس حاليا عملوا سور حوالين التمثال عشان فيه ناس كتير كانت بتقع في بركه المياة اللي حوالين التمثال عشان ماكنوش بياخدوا بالهم وهمه بيتصوروا فا عملوا سور حوالين التمثال عشان ماحدش يقع في البركه.
ودي شويه صور صورتها للمعروضات الموجوده علي الدرج العظيم و كمان صورت حاجات مميزة جوه صالات العرض ..
عيش كان بيتدفن مع الموتي :
المتحف كبير جداً من جوه وعشان تتفرج علي كل حاجه بعناية حتاخد وقت طويل بس بصراحه من أول ما بتخش مش بتبقي عاوز تمشي !
وأخيراً مع اللحظه اللي طال أنتظارها وهي لحظه أني اتصور جمب قناع توت عنخ أمون .. طبعاً دي ماكنتش أول مره أشوفوا أنا رحت كتير وشوفته في المتحف المصري في التحرير قبل كدا بس كان ممنوع التصوير .. بس دلوقتي بقي عادي تقف وتتصور جمب القناع!
الصالة اللي معروض فيها كل مقتنيات توت عنخ أمون من التوابيت اللي كان مدفون فيها لملابسه والحلي والمصوغات بتاعته والعروش كلها معروضه وبصراحه لا الكلام والصور حيقدر يعبر عن اية العظمه دي بجد ! الحاجه أما بتشوفها بعينك غير خالص الصور ! كل المعروضات مبهرة جداً !
و بالمناسبه متوفر شرح لكل المعروضات في المتحف باللغة اليابانية ! حاولت أقرأ اللي مكتوب بالياباني بس للاسف فيه كانجي كتير ماكنتش عارفه قرايته فا قمت مصوره شويه عشان اقعد اذاكرهم في البيت!
طبعاً كان فيه حاجه أخيرة لازم كنت أشوفها في المتحف بس بجد كنت تعبت و جعت جداً فا ماقدرتش أروح أشوفها وهو مركب خوفو كانت في مبني تاني بعيد شويه فا ماقدرتش أكمل مشي فا أن شاءالله في زيارتي التالته للمتحف حبقي أروح وأشوفها وأصورها!
