في المقالة دي حنتكلم عن أبرز مظاهر الفلكلور الشعبي المصري وهي رقصه (التنورة). رقصه التنورة (والكلمه معناها جيبة) رقصه ذات أصول صوفية بتعود إلي الطريقه المولوية اللي أسسها جلال الدين الرومي من أصول فارسية. حقول شوية .معلومات أساسيه عن الرقص الصوفي عشان مرتبط برقص التنورة المصري

قبل ما يبقي رقص التنورة يكون بالصورة المتعارف عليها دلوقتي في مصر كان فيه نوع من الرقصات الروحانية أسمه (الرقص الصوفي أو المولوي/ الرقص ده برضه منتشر في مصر جداً بس أصول الرقص الصوفي تركية) هو طقس روحاني مشهور بيه أتباع جلال الدين الرومي وبيبقي أسمهم (الدراويش). الغرض من الرقص الصوفي هو التفكر والتقرب لله. الرقص بيبقي عن حركات دائريه مستمرة مع رفع الاذرع للسماء. كلمه أو أسم (درويش) أصلها فارسي و معناها (الفقير إلي الله) وبيرمز علي الشخص اللي إتخلي عن الرغبات الدنيوية وبيدور علي طرق يتقرب بيها لربنا. وكلمه درويش برضه بتبقي أسم من أسامي الرجالة.

الراقصون في الرقص الصوفي ليهم لبس مميز بيكون عبارة عن رداء أبيض فضفاض وطربوش طويل (زي ما موضح في الصورة) . وملابس الراقصون ليها دلالات ومعاني :

· الطربوش أو القبعة الطويلة: بترمز لشاهد القبر. (شاهد القبر :هو علامة حجرية (رخام أو جرانيت) توضع فوق القبر، وغالبًا ما تحمل اسم المتوفى وتاريخ ميلاده ووفاته لتحديد هويته. )

·  العباءة السوداء: بتتلبس في بداية الرقصه وبترمز للقبر أو الظلام الدنيوي بيخلعها الدرويش (الراقص) قبل بدء الدوران وكأن روحه بتتولد من جديد.

·  الفستان الفضفاض أو الرداء الأبيض الواسع: بيرمز للكفن..وبيرمز لنقاء الروح والتحرر من الجسد و الرداء ده واسع عشان يسمح بحركات دروان حره زي ماتكون الروح بتتمدد وبتتوسع.

·  الحزام: بيرمز للالتزام والأنضباط الروحي.

الرقصه عبارة عن دواران عكس عقارب الساعة وبيبقي الدراع اليمين متوجه للسماء والدراع الشمال لتحت والرأس مائل شوية دلاله علي التواضع والخضوع.

الرقصه الدائريه بتحاكي حركه الكون حيث بيكون فيه راقص في النص بيمثل الشمس والراقصون اللي حواليه بيمثلوا الكواكب اللي بتدور حول الشمس بطريقة لا نهائية بترمز لفقدان الأحساس بالذات (الفناء أو الموت).

الراقصون تدريجياً بيخشوا في حالة من السكون بيبقي عبارة عن تركيز عميق وتنفس منتظم وأيقاع ثابت وشعور بالخفه والأنفصال عن الجسد.

طيب إيه الفرق بين الرقص الصوفي والرقص التنورة المصري؟

الرقص الصوفي بيعتبر طقس روحاني وديني في تركيا أما في مصر رقص التنورة واخد طابع شعبي وإستعراضي أكتر وهو محتفظ بشكل الحركات الدائرية ولكن الفرق بقي حاجات كتير .. تعالوا الأول نتكلم عن الازياء في رقصه التنورة الشعبية المصرية:

الملابس ودلالاتها:

ملابس راقص التنورة في مصر بتبقي عبارة عن جيبه واسعه دائرية وهي أهم عنصر في العرض لأنها بتتحرك مع دوران الراقص وبتخلق شكل بصري مبهر. بس علي عكس الرقص الصوفي اللي الزي بتاعه بسيط ولونة أبيض فا راقص التنورة بتبقي ملابسة ملونه:

- اللون الأحمر: بيعبر عن الحياة والطاقة.

- اللون الأخضر: البركة والروحانية.

-  اللون الأزرق: لون السماء اللي بيعبر عن الصفاء والنقاء.

- اللون الأصفر: بيعبر عن النور.

ثانياً: راقص التنورة ممكن يبلس كذا تنورة فوق بعض وأحياناً بيشيل طبقه من التنورات ويلف بيها في أيدة وده بيظهر مهارة الراقص في الأداء وإتقان الرقصة.

ثالثاً: شكل العرض:

عرض التنورة بيبقي مع فرقة شعبية بتعزف علي المزمار والطبلة و بيبقي فيه إنشاد ديني أو مدائح نبوية ومدتة بتكون من 10 ل 30 دقيقة.

الراقص بيقعد يلف لفترات طويلة جداً من غير ما يقع وده بيحتاج توازن وتدريب جسدي قوي جداً.

الفرق بين التنورة والرقص الصوفي (المولوي):

رقص التنورة (مصر)

عرض فني شعبي

ملابس ملونة وزخارف

أجواء احتفالية وطاقة عالية

حركات أسرع واستعراض أكتر

الرقص الصوفي أو المولوي (تركيا)

طقس ديني منظم

ملابس بيضاء بسيطة

أجواء هادئة وتأملية

حركة منتظمة ببط

وبالرغم أن رقص التنورة رقص إستعراضي وفني في مصر الأ أنه مازال محتفظ بنفس الدلالات الروحانية زي :

حركة الدوران: حركة الكواكب والمجموعه الشمسية.

الإتزان أثناء الدوران: الإتزان بين الروح والجسد.

رقص التنورة بيتقدم في معظم الأماكن السياحية والغير سياحية في مصر كفلكلور ترفيهي خصوصاً في شهر رمضان حتلاقوا عروض لرقص التنورة في الخيم الرمضانية.

هل رقص التنورة مقتصر علي الذكور فقط؟

بنسبة كبيرة في مصر أه.. أغلب الراقصين ذكور فقط. لكن مؤخراً في العروض الحديثة بدأت تظهر مشاركات نسائية بس مش منتشرة بكثرة.

رقص التنورة الشعبي في مصر له أجواء مبهجه جداً خصوصاً في رمضان والعروض بالرقصه دي متنوعة جداً وساعات راقصين التنورة بيركبوا أَضاءات في التنورة وبتعمل شكل مبهر جداً في أداء الرقصة.

وكمان الراقصين بيتفاعلوا مع الجمهور وبيخلوهم يلبسوا التنورة ويجربوا يلفوا بيها بس الموضوع بجد صعب لان وزن التنورة علي عكس ما إنتوا متخيلين بيبقي تقيل مش خفيف وده اللي بيميز راقصين التنورة في مهارتهم في رفع والرقص بالتنورة دي مع الدوران المستمر أعتقد دي عاوزه تدريب ومهارة عالية جداً.

ماتنسوش في زيارتكوا لمصر تحضروا عرض من عروض التنورة حتنبهروا بيها جداً.